കണ്ണൂര്: സ്കൂള് സമയ മാറ്റം പുനപരിശോധിക്കില്ലെന്ന് പൊതുവിദ്യാഭ്യാസ വകുപ്പ് മന്ത്രി വി ശിവന്കുട്ടി. ഹൈക്കോടതി നിര്ദേശാനുസരണമാണ് ഇക്കാര്യത്തില് തീരുമാനം എടുത്തതെന്നും ഇത് സംബന്ധിച്ച കാര്യങ്ങള് ബോധ്യപ്പെടുത്താന് ആരുമായും ചര്ച്ചക്ക് തയാറെന്നും മന്ത്രി അറിയിച്ചു. കണ്ണൂരില് മാധ്യമപ്രവര്ത്തകരോട് സംസാരിക്കവെയാണ് മന്ത്രി നിലപാട് വ്യക്തമാക്കിയത്.
വൈസ് ചാന്സലര് വിഷയത്തില് ഹൈക്കോടതി വിധി ഗവര്ണര്ക്ക് തിരിച്ചടിയെന്നും മന്ത്രി പറഞ്ഞു. ഈ സാഹചര്യത്തില് ഗവര്ണര് മാറിനില്ക്കണം. ഗവര്ണര് നിയമിച്ചവര് എടുത്ത തീരുമാനങ്ങള് പുന:പരിശോധിക്കപ്പെടണം. ഹൈക്കോടതി വിധിയുടെ പശ്ചാത്തലത്തില് ഇവരുടെ ശമ്പളം തിരിച്ചു പിടിക്കുന്ന കാര്യം പരിഗണിക്കണമെന്നും ശിവന് കുട്ടി അഭിപ്രായപ്പെട്ടു.
സ്കൂളുകളില് കാല് കഴുകല് പോലുള്ള ‘ദുരാചാരങ്ങള്’ അനുവദിക്കില്ലന്നും മന്ത്രി പറഞ്ഞു.. ആധുനിക കേരളത്തില് നടക്കാന് പാടില്ലാത്ത സംഭവമാണ് കാല് കഴുകല് എന്നാണ് മന്ത്രിയുടെ നിലപാട്. ഇക്കാര്യം പൊതുവിദ്യാഭ്യാസ വകുപ്പ് ഡയറക്ടര് അന്വേഷിക്കുകയാണ്. ഇത്തരം കാര്യങ്ങള് ചെയ്യിക്കുന്നവര് ശിക്ഷാ നടപടികളെ നേരിടേണ്ടി വരുമെന്നും ശിവന്കുട്ടി പറഞ്ഞു.
