ഇറച്ചിയിലെ ഐസ് കളയാന് ഫ്രിജിൽ നിന്ന് പുറത്തെടുത്ത് വയ്ക്കുന്നവരാണ് പലരും . എന്നാല് ഈ രീതി ചിലപ്പോൾ വലിയ അപകടങ്ങൾ ക്ഷണിച്ചു വരുത്തിയേക്കാം .ലോകാരോഗ്യ സംഘടനയും(WHO) യു എസ് ഫുഡ് ആൻഡ് ഡ്രഗ് അഡ്മിനിസ്ട്രേഷനും(FDA) പോലുള്ള പ്രധാന ഭക്ഷ്യ സുരക്ഷാ സ്ഥാപനങ്ങൾ പറയുന്നത്, ഇങ്ങനെ പുറത്ത് വച്ച് ഇറച്ചിയിലെ ഐസ് കളയുമ്പോൾ, അത് ഹാനികരമായ ബാക്ടീരിയകൾ വളരാനും ആരോഗ്യത്തെ ദോഷകരമായി ബാധിക്കാനും ഇടയാക്കുമെന്നാണ്.
സാൽമൊണല്ല, ഇ-കോളി, ലിസ്റ്റീരിയ മോണോസൈറ്റോജെൻസ് തുടങ്ങിയ അപകടകാരികളായ ബാക്ടീരിയകൾക്ക് വെറും 20 മിനിറ്റിനുള്ളിൽ ഇരട്ടിയാകാൻ കഴിയുമെന്ന് സെൻ്റേഴ്സ് ഫോർ ഡിസീസ് കൺട്രോൾ ആൻഡ് പ്രിവൻഷൻ (CDC) പറയുന്നു.ഇറച്ചി സാധാരണ താപനിലയില് ഐസ് കളയാനായി വയ്ക്കുമ്പോൾ, അതിന്റെ പുറംഭാഗം വേഗത്തിൽ ചൂടാകാൻ തുടങ്ങും. ഏകദേശം 4.4 ഡിഗ്രി സെൽഷ്യസിന് മുകളിലേക്ക് താപനില എത്തിക്കഴിഞ്ഞാല്, ആ ഭക്ഷണം പിന്നെ രണ്ട് മണിക്കൂറിൽ കൂടുതൽ വയ്ക്കുകയാണെങ്കിൽ, ബാക്ടീരിയകൾ വളരെ വേഗത്തിൽ വളരാൻ സാധ്യതയുണ്ട്.
ഇവ പിന്നീട് വിഷവസ്തുക്കൾ (toxins) ഉത്പാദിപ്പിക്കുന്നു. ഇത് ഉള്ളിലെത്തിയാല് രോഗപ്രതിരോധശേഷി കുറയ്ക്കാനും പനി, ഓക്കാനം, ഛർദ്ദി, വയറിളക്കം തുടങ്ങിയ ലക്ഷണങ്ങളോടുകൂടിയ ഭക്ഷ്യവിഷബാധയ്ക്കും കാരണമായേക്കാം. അതിനാല്, വേവിക്കാത്ത ഇറച്ചി ഉൾപ്പെടെയുള്ള, പെട്ടെന്ന് കേടുവരുന്ന ഭക്ഷണങ്ങൾ രണ്ട് മണിക്കൂറിൽ കൂടുതൽ റൂം ഊഷ്മാവിൽ വയ്ക്കരുതെന്ന് യുണൈറ്റഡ് സ്റ്റേറ്റ്സ് ഡിപ്പാർട്ട്മെൻ്റ് ഓഫ് അഗ്രിക്കൾച്ചർ (USDA) കർശനമായി നിർദ്ദേശിക്കുന്നു.
ഫ്രീസറിൽ നിന്ന് ഇറച്ചി എടുത്ത് ഫ്രിജിന്റെ താഴെത്തട്ടിൽ ഒരു പാത്രത്തിൽ വയ്ക്കുക. ഇറച്ചിയുടെ വലുപ്പമനുസരിച്ച് കുറച്ച് മണിക്കൂറുകൾ മുതൽ ഒരു ദിവസം വരെ ഇങ്ങനെ ഐസ് കളയാൻ സമയമെടുത്തേക്കാം. ഈ രീതിയിൽ ഐസ് കളയുമ്പോൾ ഇറച്ചി എപ്പോഴും സുരക്ഷിതമായ താപനിലയിൽ (4.4°C-ന് താഴെ) ആയിരിക്കും.
ഇറച്ചി വെള്ളം കയറാത്ത ഒരു ബാഗിലാക്കി, തണുത്ത വെള്ളത്തിൽ താഴ്ത്തി വെക്കുക. ഓരോ 30 മിനിറ്റിലും വെള്ളം മാറ്റിക്കൊണ്ടിരിക്കണം. ചെറിയ കഷണം ഇറച്ചിയാണെങ്കിൽ ഒന്നോ രണ്ടോ മണിക്കൂറിനുള്ളിൽ ഐസ് പോയിക്കിട്ടും. എന്നാല്, ഇങ്ങനെ ഐസ് കളഞ്ഞ ഇറച്ചി ഉടൻ തന്നെ പാചകം ചെയ്യണം.
