ന്യൂദല്ഹി: പുല്വാമ ഭീകരാക്രമണത്തിനായുള്ള സ്ഫോടക വസ്തുക്കള് വാങ്ങിയത് ഓണ്ലൈന് ഷോപ്പിങ്ങിലൂടെ. ആക്രമണത്തിന്റെ ആസൂത്രണങ്ങള്ക്കായി ഓണ്ലൈന് പ്ലാറ്റ്ഫോമുകളെയാണ് ഭീകരര് ആശ്രയിച്ചത്. 2022ലെ ഗോരഖ്നാഥ് ക്ഷേത്രത്തിലുണ്ടായ ആക്രമണത്തിന് വേണ്ടിയും ഇത് പ്രയോജനപ്പെടുത്തിയെന്നും ദ ഫിനാന്ഷ്യല് ആക്ഷന് ടാസ്ക് ഫോഴ്സ് (എഫ്എടിഎഫ്) റിപ്പോര്ട്ട്. കള്ളപ്പണം വെളുപ്പിക്കല്, ഭീകരപ്രവര്ത്തനങ്ങള്ക്കായുള്ള ധനസഹായം തുടങ്ങിയവ നിരീക്ഷിക്കുന്ന ആഗോള സംഘടനയാണ് എഫ്എടിഎഫ്.
ഐഇഡി സ്ഫോടനത്തിന്റെ ശക്തി വര്ദ്ധിപ്പിക്കുന്നതിനുള്ള അലൂമിനിയം പൊടിയാണ് ഇത്തരത്തില് ആമസോണ് ഇ കൊമേഴ്സ് പ്ലാറ്റ്ഫോം വഴി ഭീകരര് വാങ്ങിയത്. പാകിസ്ഥാന് കേന്ദ്രീകരിച്ചു പ്രവര്ത്തിക്കുന്ന ജെയ്ഷ ഇ മുഹമ്മദ് ഭീകര സംഘടനയാണ് പുല്വാമ ഭീകരാക്രമണത്തിന് പിന്നില്. ഭീകരാക്രമണത്തില് 40 സിആര്പിഎഫ് ജവാന്മാരാണ് കൊല്ലപ്പെട്ടത്. സംഭവത്തില് ഏഴ് വിദേശ പൗരന്മാര് അടക്കം പത്തൊമ്പത് പേരെ അറസ്റ്റ് ചെയ്തിട്ടുണ്ട്.
ഇ- കൊമേഴ്സ് പ്ലാറ്റ്ഫോമുകളും ഓണ്ലൈന് പേയ്മെന്റ് സര്വീസുകളും ഉപയോഗിച്ച് ഭീകരര് ആക്രമണത്തിന് ആസൂത്രണം ചെയ്യുന്നതിലെ ആശങ്ക എഫ്എടിഎഫ് പ്രകടിപ്പിച്ചു. 2022 ഏപ്രിലില് ഗോരഖ്നാഥ് ക്ഷേത്രത്തില് നടന്ന ആക്രമണത്തിലും ഓണ്ലൈന് വഴിയാണ് ഭീകരന് ഇടപാടുകള് നടത്തിയത്. ഐഎസില് നിന്ന് പ്രചോദനമുള്ക്കൊണ്ട പ്രതി ക്ഷേത്രത്തിലെ സുരക്ഷാജീവനക്കാരെ ആക്രമിക്കുകയായിരുന്നു. ഐഎസിന്റെ പ്രവര്ത്തകര്ക്കുവേണ്ടി ഇയാള് 6.7 ലക്ഷം രൂപ പേപാല് വഴി കൈമാറ്റം ചെയ്തിട്ടുണ്ട്.
