ആലപ്പുഴ: സംസ്ഥാന ജലഗതാഗത വകുപ്പിന്റെ ബജറ്റ് ടൂറിസം യാത്ര പദ്ധതിയുടെ ഭാഗമായി കുട്ടനാട് സഫാരി ആരംഭിക്കുന്നു. ഇതിന് മുന്നോടിയായി ഗതാഗത വകുപ്പ് മന്ത്രി കെ. ബി. ഗണേഷ് കുമാര് മുഹമ്മ ഗ്രാമപഞ്ചായത്തിലെ പാതിരമണല് ദ്വീപ് സന്ദര്ശിച്ചു. കുട്ടനാടിന്റെ മുഴുവന് മനോഹാരിതയും ഒറ്റ ബോട്ട് യാത്രയില് ആസ്വദിക്കാവുന്ന വിധം ഗള്ഫ് രാജ്യങ്ങളിലെ ഡെസേര്ട്ട് സഫാരിക്ക് തത്തുല്യമായിട്ടായിരിക്കും ഈ പദ്ധതി നടപ്പിലാക്കുകയെന്ന് മന്ത്രി പറഞ്ഞു.
കുട്ടനാട് ഒരുപാട് കലാരൂപങ്ങളുടെയും പാട്ടുകളുടെയും സംസ്കാരകേന്ദ്രമാണ്. ഇതെല്ലാം കാണുന്നതിനും അടുത്തറിയുന്നതിനും ഈ പാക്കേജിലൂടെ സാധ്യമാകും. ആലപ്പുഴയില് നിന്ന് ആരംഭിക്കുന്ന യാത്രയുടെ ഭാഗമായി ലഘുഭക്ഷണം, കള്ളുഷാപ്പില് നിന്നും ചെത്ത് കള്ള്, ഉച്ചഭക്ഷണം എന്നിവയെല്ലാം വിനോദസഞ്ചാരികള്ക്ക് ആസ്വദിക്കാം. കൂടാതെ ചിത്രകാരന് ലൈവായി വിനോദസഞ്ചാരികളുടെ ചിത്രങ്ങളും വരച്ച് നല്കും. ആലപ്പുഴയുടെ കയര് പിരിയും ഓല മെടയുന്നതും എല്ലാം കാണുന്നതിനും സ്വന്തമായി ചെയ്യുന്നതിനും സഞ്ചാരികള്ക്ക് അവസരം ലഭിക്കും. കൂടാതെ ഓലകൊണ്ടുള്ള പന്ത്, തൊപ്പി എന്നിവയും അവര്ക്കായി തത്സമയം നിര്മ്മിക്കുകയും പ്രദര്ശിപ്പിക്കുകയും ചെയ്യുമെന്ന് മന്ത്രി പറഞ്ഞു.
ഈ യാത്ര വൈകിട്ട് നാല് മണിയോടെ പാതിരമണലില് എത്തും. വേമ്പനാട് കായലിലെ ദ്വീപില് പുല്ലും മുളയും കൊണ്ട് നിര്മ്മിച്ച ആംഫി തിയേറ്ററും പഞ്ചായത്തിന്റെ സഹകരണത്തോടെ പൂര്ത്തിയാക്കും.
തിയേറ്ററില് പുതുതലമുറക്ക് സുപരിചിതമല്ലാത്ത നാട്ടിന് പുറങ്ങളില് സജീവമായിരുന്ന നാടന് കലാരൂപങ്ങള് അവതരിപ്പിക്കും. ഒന്നേകാല് മണിക്കൂറോളം വൈവിധ്യമായ ആറോളം കലാരൂപങ്ങള് അവതരിപ്പിക്കും.
