പാലക്കാട്: സംസ്ഥാനത്തെ നെല്കര്ഷകര് നേരിടുന്ന പ്രശ്നങ്ങള് സംബന്ധിച്ച തെളിവെടുപ്പിനിടെ ലഭിച്ച വിവരങ്ങള് ക്രോഡീകരിച്ച് രണ്ടാഴ്ച്ചക്കകം കേന്ദ്രസര്ക്കാരിന് റിപ്പോര്ട്ട് സമര്പ്പിക്കുമെന്ന് ബിജെപി ദേശീയനിര്വാഹക സമിതി അംഗം കുമ്മനം രാജശേഖരന് പറഞ്ഞു.
കേരളത്തിലെ കര്ഷകരുടെ പ്രശ്നങ്ങള് പഠിച്ച് കേന്ദ്രസര്ക്കാരിന് റിപ്പോര്ട്ട് സമര്പ്പിക്കുന്നതിന് വേണ്ടി ബിജെപി സംസ്ഥാന നേതൃത്വം നിയോഗിച്ച മൂന്നംഗ സമിതി പാലക്കാട്ടെ കര്ഷകരില് നിന്ന് വിവരങ്ങള് തേടിയശേഷം നടത്തിയ പത്രസമ്മേളനത്തില് സംസാരിക്കുകയായിരുന്നു അദ്ദേഹം. കര്ഷക തെളിവെടുപ്പിന് ശേഷം സംസ്ഥാന കൃഷി-ഭക്ഷ്യ-ജലവിഭവ-വൈദ്യുതി വകുപ്പ് മന്ത്രിമാരുമായി ചര്ച്ച നടത്തും. തുടര്ന്ന് കേന്ദ്ര കൃഷിവകുപ്പ് മന്ത്രിയെ നേരില്ക്കണ്ട് റിപ്പോര്ട്ട് സമര്പ്പിക്കുമെന്നും കുമ്മനം വ്യക്തമാക്കി. ഇതുസംബന്ധിച്ച് ധവളപത്രം ഇറക്കും.
നെല്ല് സംഭരണവും, തുടര്ന്ന് പണം ലഭിക്കുന്നതിലെ കാലതാമസവും ഒഴിവാക്കുന്നതിന് എന്സിസിഎഫ് മുഖേന നെല്ലെടുക്കണമെന്ന കര്ഷകരുടെ ആവശ്യവും കേന്ദ്രത്തിന്റെ ശ്രദ്ധയില്പ്പെടുത്തും. ഇക്കാര്യത്തില് സമ്മര്ദ്ദം ചെലുത്തുമെന്നും അദ്ദേഹം കൂട്ടിച്ചേര്ത്തു. നെല്ല് സംഭരിച്ച് 48 മണിക്കൂറിനുള്ളില് പണം നല്കണമെന്ന സംസ്ഥാന സര്ക്കാരും കേന്ദ്രസര്ക്കാരും തമ്മിലുള്ള ധാരണാപത്രം പാലിക്കാന് സംസ്ഥാന സര്ക്കാര് തയ്യാറാകണം. കേരളം തന്നെ ഉണ്ടാക്കിയ വ്യവസ്ഥയില് അവര് തന്നെ വെള്ളം ചേര്ക്കുകയാണ്. നെല്ല് സംഭരണവുമായി ബന്ധപ്പെട്ട കണക്ക് നല്കാന് പോലും സംസ്ഥാന സര്ക്കാര് തയ്യാറാകുന്നില്ല. കര്ഷകര്ക്ക് കൊടുക്കേണ്ട പണം വകമാറ്റുകയാണ് ചെയ്യുന്നത്. ഓരോ വര്ഷവും സംസ്ഥാനത്ത് ഭക്ഷ്യോത്പാദനം കുറഞ്ഞുവരികയാണ്. നെല്ല് സംഭരണം കേന്ദ്രം ഏറ്റെടുക്കണമെന്ന കര്ഷകരുടെ ആവശ്യം കേന്ദ്രസര്ക്കാരിന്റെ ശ്രദ്ധയില്പ്പെടുത്തും. കേന്ദ്രമന്ത്രിമാരെ നേരില്ക്കണ്ട് കര്ഷകര് നേരിടുന്ന പ്രശ്നങ്ങള് ബോധിപ്പിക്കും. പ്രശ്നത്തില് കേന്ദ്ര ഇടപെടലിനായി സമ്മര്ദ്ദം ചെലുത്തും.
കാര്ഷികവൃത്തി കൊണ്ട് ജീവിക്കാന് കഴിയാത്ത അവസ്ഥയിലാണ് സംസ്ഥാനത്തെ കര്ഷകര്. കടക്കാരായി വീടും സ്വത്തും നഷ്ടപ്പെട്ട കര്ഷകര് ആത്മഹത്യയുടെ വക്കില് നില്ക്കുമ്പോള് സംസ്ഥാന സര്ക്കാര് ഇതൊന്നും കണ്ടില്ലെന്ന് നടിക്കുന്നു. കര്ഷകരുടെ കണ്ണീരിനു മുന്നില് നിഷേധാത്മക നിലപാടാണ്. തലമുറകളായി ചെയ്യുന്ന കാര്ഷികവൃത്തിയില് നിന്ന് കര്ഷകര് പിന്തിരിഞ്ഞുപോവുകയാണ്. ഇക്കണക്കിന് പോയാല് സംസ്ഥാനത്ത് രൂക്ഷമായ ഭക്ഷ്യപ്രതിസന്ധിയുണ്ടാവും. ഭാരതത്തിലെ നെല്ല് ഉത്പാദനത്തിലെ പ്രധാന കേന്ദ്രം നെല്ലറയുടെ നാടായ പാലക്കാടാണ്.
കൃഷിവകുപ്പ് നല്കുന്ന വിത്തുകള്ക്ക് പോലും ഗുണനിലവാരമില്ല. നെല്ലിന്റെ വില കിലോയ്ക്ക് 40 രൂപയാക്കണമെന്നും, തുക കൃത്യമായി കിട്ടണമെന്നുമാണ് കര്ഷകരുടെ ആവശ്യം. കേന്ദ്രം നല്കുന്ന പണം വകമാറ്റി ചെലവഴിക്കുകയാണ്. കൃത്യമായ കണക്ക് നല്കാന് പോലും സര്ക്കാര് തയ്യാറാകുന്നില്ലെന്നും അദ്ദേഹം വ്യക്തമാക്കി. സംസ്ഥാനത്ത് നെല്ല് സംഭരണത്തില് വലിയ അപാകതകളുണ്ട്. മറ്റുള്ള സംസ്ഥാനങ്ങളില് ഇല്ലാത്ത പ്രശ്നമാണ് കേരളത്തിലുള്ളതെന്നും കുമ്മനം പറഞ്ഞു. നെല്ല് സംഭരണം, സംഭരണവില ലഭിക്കുന്നതിലെ കാലതാമസം, കാര്ഷിക പാക്കേജ്, വന്യമൃഗശല്യം, തൊഴിലാളിക്ഷാമം തുടങ്ങി നിരവധി വിഷയങ്ങളും കര്ഷകര് സമിതിയുമായി പങ്കുവച്ചു. നാളെ ആലപ്പുഴയിലെ കര്ഷകരുമായും സമിതി അംഗങ്ങളുമായും കൂടിക്കാഴ്ച നടത്തും. പത്രസമ്മേളനത്തില് ബിജെപി സംസ്ഥാന ജന. സെക്രട്ടറി സി. കൃഷ്ണകുമാര്, കര്ഷമോര്ച്ച സംസ്ഥാന അധ്യക്ഷന് ഷാജി രാഘവന്, ബിജെപി പാലക്കാട് ഈസ്റ്റ് ജില്ലാ അധ്യക്ഷന് പ്രശാന്ത് ശിവന് എന്നിവരും പങ്കെടുത്തു.
