പത്തനംതിട്ട: ഈ മാസം മൂന്നു തവണയായി എട്ട് ദിവസം ശബരിമല നട തുറക്കും. അപൂര്വമായാണ് ഒരു മാസം മൂന്നുതവണ ശബരിമല നട തുറക്കുന്നത്. നവഗ്രഹ പൂജ, കര്ക്കടക മാസ പൂജ, നിറപുത്തരി എന്നിവയ്ക്കാണ് നട തുറക്കുന്നത്. തിരക്ക് നിയന്ത്രിക്കാന് വെര്ച്വല് ക്യൂ ബുക്കിങ് ആരംഭിച്ചു.
പുതുതായി പണിത നവഗ്രഹ ക്ഷേത്രത്തിന്റെ പ്രതിഷ്ഠക്കായി 11ന് വൈകിട്ട് അഞ്ചിന് നട തുറക്കും. 12ന് പതിവുപൂജകള് നടക്കും. 13ന് രാവിലെ 11 നും 12നും മധ്യേയാണ് നവഗ്രഹക്ഷേത്ര പ്രതിഷ്ഠ നടക്കുക. അന്ന് രാത്രി 10ന് നട അടയ്ക്കും. കര്ക്കടക മാസ പൂജകള്ക്കായി 16ന് വീണ്ടും നട തുറക്കും. 21ന് രാത്രി 10ന് നട അടയ്ക്കും. നിറപുത്തരിക്കായി 29ന് വൈകിട്ട് അഞ്ചിന് വീണ്ടും നട തുറക്കും. 30ന് പുലര്ച്ചെ 5.30നും 6.30 നും മധ്യേയാണ് നിറപുത്തരി പൂജ. രാത്രി 10ന് നട അടയ്ക്കും.
