കാസര്കോട്: മുള്ളേരിയ ആദൂര് ഗവ. ഹയര്സെക്കന്ഡറി സ്കൂളില് ഷൂസ് ധരിച്ചെത്തിയ പ്ലസ്വണ് വിദ്യാര്ത്ഥിയെ ക്രൂരമായി മര്ദിക്കുകയും ദേഹത്ത് ഡസ്കിട്ട് പരിക്കേല്പ്പിക്കുകയും ചെയ്തതായി പരാതി. സംഭവത്തില് പ്ലസ്ടു വിദ്യാര്ത്ഥികളായ ആറുപേര്ക്കെതിരെ ആദൂര് പോലീസ് കേസെടുത്തു. റാഗിംഗിനെതിരായ വകുപ്പുകള് പ്രകാരമാണ് കേസ്. ജൂണ് 20നാണ് കേസിനാസ്പദമായ സംഭവം.
ക്ലാസ് മുറിയിലും ബസ് സ്റ്റോപ്പ് പരിസരത്തും നടന്ന ക്രൂരമായ മര്ദനത്തെ കുറിച്ച് പ്ലസ്വണ് വിദ്യാര്ത്ഥി ഭയം കാരണം ആരോടും പറഞ്ഞില്ല. എന്നാല് രണ്ട് ദിവസത്തിനുശേഷം കഴുത്ത് അനക്കാന് ബുദ്ധിമുട്ട് അനുഭവപ്പെട്ടതോടെയാണ് മര്ദനത്തിനിരയായ കാര്യം പുറത്ത് പറഞ്ഞത്. കാസര്കോട്ടെ സ്വകാര്യ ആശുപത്രിയില് ചികിത്സ തേടിയശേഷം പ്രിന്സിപ്പലിനും ആദൂര് പോലീസിലും പരാതി നല്കി. പോലീസിന്റെ ആവശ്യപ്രകാരം സ്കൂളിലെ ആന്റി റാഗിംഗ് കമ്മറ്റി അന്വേഷണം നടത്തി. ഷൂസ് ധരിച്ച് ക്ലാസിലെത്തിയതിന്റെ വിരോധത്തിലാണ് പ്ലസ്വണ് വിദ്യാര്ത്ഥിയെ ക്രൂരമായ റാഗിംഗിന് ഇരയാക്കിയതെന്ന് കമ്മറ്റി നല്കിയ റിപ്പോര്ട്ടില് പറഞ്ഞു. ഇതേ തുടര്ന്നാണ് ആന്റി റാഗിംഗ് വകുപ്പ് ചേര്ത്ത് ആറ് പ്ലസ്ടു വിദ്യാര്ത്ഥികള്ക്കെതിരെ കേസെടുത്തു.
സമാനമായ മറ്റൊരു സംഭവത്തില് ആദൂര് പോലീസ് രജിസ്റ്റര് ചെയ്ത കേസില് റാഗിംഗിനെതിരായ വകുപ്പു കൂടി ചേര്ത്തു. ഷൂസ് ധരിച്ച് ക്ലാസിലെത്തിയ വിദ്യാര്ത്ഥിയെ ക്രൂരമായി മര്ദ്ദിക്കുകയും ബഞ്ച് ദേഹത്തിട്ട് കൈയ്യെല്ല് പൊട്ടിച്ചുവെന്നുമാണ് കേസ്. ഇരു കേസുകളിലും പ്രതികളായ ഒന്പതു പ്ലസ്ടു വിദ്യാര്ത്ഥികളെ സ്കൂള് അധികൃതര് ക്ലാസില് നിന്ന് സസ്പെന്റ് ചെയ്തു.
