കൊച്ചി: ‘വിദ്യാഭ്യാസത്തിലൂടെ വികസിത ഭാരതം’ എന്ന ലക്ഷ്യത്തോടെ ശിക്ഷ സംസ്കൃതി ഉത്ഥാന് ന്യാസിന്റെ നേതൃത്വത്തില് എറണാകുളത്ത് ജൂലൈ 25 മുതല് 28 വരെ ദേശീയ വിദ്യാഭ്യാസ സമ്മേളനങ്ങള് നടക്കും. സമ്മേളനങ്ങളുടെ ഭാഗമായി വിവിധ സര്വകലാശാല വൈസ്ചാന്സലര്മാര് മാര്ഗദര്ശികളായി 101 അംഗ സ്വാഗതസംഘം രൂപീകരിച്ചു. ജൂലൈ 25,26,27 തീയതികളില് വെളിയനാട് ചിന്മയ മിഷന്റെ ആസ്ഥാനത്ത് വിദ്യാഭ്യാസ വിചക്ഷണന്മാരുടെ ദേശീയ സമ്മേളനം ചേരും. 27ന് 1000 അദ്ധ്യാപകരും വിദ്യാഭ്യാസ രംഗത്തെ പ്രമുഖരും പങ്കെടുക്കുന്ന ജ്ഞാനസഭ. 28 ന് സര്വകലാശാല വൈസ്ചാന്സലര്മാരുടെ ദേശീയ സമ്മേളനം ഇടപ്പള്ളി അമൃത വിശ്വവിദ്യാപീഠത്തില്.
സമ്മേളനങ്ങളില് ആര്എസ്എസ് സര്സംഘചാലക് ഡോ. മോഹന് ഭാഗവത് ഉള്പ്പെടെ പ്രമുഖ വ്യക്തിത്വങ്ങള് പങ്കെടുക്കുമെന്ന് വിദ്യാഭ്യാസ വികാസ കേന്ദ്രം അറിയിച്ചു.
സ്വാഗത സംഘയോഗത്തില് വിദ്യാഭ്യാസ വികാസ കേന്ദ്രം സംസ്ഥാന അധ്യക്ഷന് ഡോ. എന്. സി. ഇന്ദുചൂഡന് അധ്യക്ഷത വഹിച്ചു. ശിക്ഷ സംസ്കൃതി ഉത്ഥാന് ന്യാസിന്റെ അഖില ഭാരതീയ ട്രഷറര് പ്രൊഫ. സുരേഷ് ഗുപ്ത ഉദ്ഘാടനം നിര്വഹിച്ചു. കൊച്ചിന് ഷിപ്പ്യാര്ഡ് ചെയര്മാന് മധു എസ്. നായര്, ശിക്ഷ സംസ്കൃതി ഉത്ഥാന് ന്യാസ് ദേശീയ ജനറല് സെക്രട്ടറി എ. വിനോദ്, വിദ്യാഭ്യാസ വികാസ കേന്ദ്രം സംസ്ഥാന സംഘടന കാര്യദര്ശി ബി.കെ. പ്രിയേഷ് കുമാര്, വിദ്യാഭ്യാസ വികാസ കേന്ദ്രം പരിസ്ഥിതി വിഭാഗം സംയോജകന് ഡോ. ജഗദീഷ് നമ്പ്യാര്, വിദ്യാഭ്യാസ വികാസ കേന്ദ്രം സംസ്ഥാന സഹസംയോജക് ജയകൃഷ്ണന് ആര്. എന്നിവര് പ്രസംഗിച്ചു.
സംഘാടക സമിതി: മാതാഅമൃതാനന്ദമയി(മുഖ്യരക്ഷാധികാരി), ചിന്മയമിഷന് കേരളം മേധാവി സ്വാമി വിവിക്താനന്ദ സരസ്വതി, ബത്തേരി ബിഷപ്പ് ഡോ. ജോസഫ് മാര് തോമസ്, ആര്എസ്എസ് ദക്ഷിണ കേരള പ്രാന്ത സംഘ ചാലക് പ്രൊഫ. എം.എസ്. രമേശന്, ചേംബര് ഓഫ് കേരള കോളജസ് ചെയര്മാന് ഡോ.പി.കെ.കൃഷ്ണദാസ് (രക്ഷാധികാരിമാര്), കൊച്ചിന് ഷിപ്പിയാര്ഡ് ചെയര്മാന് മധു എസ്. നായര് (ചെയര്മാന്), അമൃത ഇന്സ്റ്റിറ്റിറ്റൂട്ട് ഓഫ് മെഡിക്കല് സയന്സ് പ്രിന്സിപ്പാള് ഡോ. ഗിരീഷ് കുമാര് (ജനറല് സെക്രട്ടറി), ബി.കെ.പ്രിയേഷ് കുമാര് (ജനറല് കണ്വീനര്), അഡ്വ. സജിത്ത് വിശ്വനാഥന്(ട്രഷറര്).
