ഇന്ത്യയുമായി ഒരു വലിയ കരാർ ചെയ്യാൻ പോകുന്നു , ചൈനയുമായി ഒരെണ്ണത്തിൽ ഒപ്പുവച്ചു ; ഡൊണാൾഡ് ട്രംപ്

വാഷിംഗ്ടൺ : ഇന്ത്യയുമായി വളരെ വലിയ കരാറിൽ ഏർപ്പെടാൻ പോകുന്നുവെന്ന് സൂചന നൽകി യുഎസ് പ്രസിഡന്റ് ഡൊണാൾഡ് ട്രംപ്. വൈറ്റ് ഹൗസിൽ നടന്ന ബിഗ് ബ്യൂട്ടിഫുൾ ബിൽ പരിപാടിയിൽ സംസാരിക്കവെയാണ് അദ്ദേഹം ഇക്കാര്യം പരാമർശിച്ചത്.

” എല്ലാവരും ഒരു കരാർ ഉണ്ടാക്കാനും അതിന്റെ ഭാഗമാകാനും ആഗ്രഹിക്കുന്നു. ഞങ്ങൾ ഇന്നലെ ചൈനയുമായി ഒരെണ്ണത്തിൽ ഒപ്പുവച്ചു. ഞങ്ങൾ ചില മികച്ച കരാറുകൾ ഉണ്ടാക്കുന്നുണ്ട്. ഞങ്ങൾക്ക് മറ്റൊരു കരാർ വരാനിരിക്കുന്നു, ഒരുപക്ഷേ ഇന്ത്യയുമായി. വളരെ വലുതാണ് ” – വ്യാപാര കരാറിനെ ചൂണ്ടിക്കാണിച്ചുകൊണ്ട് ട്രംപ് പറഞ്ഞു.

നേരത്തെ ഏപ്രിൽ 2 ന് ഇന്ത്യയിൽ നിന്ന് വരുന്ന ചില ഉൽപ്പന്നങ്ങൾക്ക് 26 ശതമാനം അധിക തീരുവ ചുമത്തുമെന്ന് യുഎസ് പ്രഖ്യാപിച്ചിരുന്നു. എന്നിരുന്നാലും ഇത് 90 ദിവസത്തേക്ക് മാറ്റിവച്ചിരിക്കുന്നു. ഇപ്പോൾ ജൂലൈ 9 ന് ശേഷം ഈ നികുതി വീണ്ടും നടപ്പിലാക്കാൻ കഴിയും. ഈ അധിക നികുതിയിൽ നിന്ന് പൂർണ്ണമായ ഇളവ് ലഭിക്കാൻ ഇന്ത്യയും ആഗ്രഹിക്കുന്നുണ്ട്. എന്നാൽ അതിനുമുമ്പ് ട്രംപ് കരാറിനെക്കുറിച്ച് സംസാരിച്ചുകൊണ്ട് ഇപ്പോൾ വലിയ സൂചനകളാണ് നൽകിയിരിക്കുന്നത്.

മറുവശത്ത് ചില പ്രത്യേക ഉൽപ്പന്നങ്ങൾക്ക് ഇന്ത്യക്ക് നികുതി ഇളവ് നൽകണമെന്ന് യുഎസ് ആഗ്രഹിക്കുന്നുണ്ട്. കൂടാതെ ഈ പരിപാടിയിൽ ചൈനയുമായി ഒരു കരാർ പൂർത്തിയായതായും ട്രംപ് പറഞ്ഞു.  എന്നിരുന്നാലും ഈ സമയത്ത് ചൈനയുമായി ഉണ്ടാക്കിയ കരാറിനെക്കുറിച്ച് ട്രംപ് വിശദമായി സംസാരിച്ചില്ല. ജൂൺ ആദ്യം, യുഎസും ചൈനയും ഒരു പുതിയ വ്യാപാര കരാറിൽ ഒപ്പുവെച്ചതായി സിഎൻഎൻ റിപ്പോർട്ട് ചെയ്തിരുന്നു.

നേരത്തെ ട്രംപ് ചൈനയ്‌ക്കെതിരെ താരിഫ് യുദ്ധം ആരംഭിച്ചിരുന്നു. ട്രംപ് സ്വീകരിച്ച നടപടികൾ യുഎസും ചൈനയും തമ്മിലുള്ള ബന്ധത്തിൽ പിരിമുറുക്കം സൃഷ്ടിക്കുന്നതായിരുന്നു.  അതേ സമയം മറ്റ് രാജ്യങ്ങളുമായി കരാറുകൾ ഉണ്ടാക്കില്ലെന്ന് ട്രംപ് ഊന്നിപ്പറഞ്ഞു.