തിരുവനന്തപുരം: കേരള സര്വകലാശാല ആസ്ഥാനത്ത് ഗവര്ണറെ തടയാനും ഭാരതമാതാവിന്റെ ചിത്രത്തെ അധിക്ഷേപിക്കാനും എസ്എഫ്ഐ നടത്തിയത് നാലുമണിക്കൂര് നേരത്തെ അക്രമം. വൈകിട്ട് 5.30ന് ശ്രീപദ്മനാഭ സേവാസമിതി സെനറ്റ് ഹാളില് സംഘടിപ്പിച്ച അടിയന്തരാവസ്ഥയുടെ അന്പതാണ്ടുകള് എന്ന പരിപാടി അലങ്കോലമാക്കാനായിരുന്നു എസ്എഫ്ഐ അക്രമം അഴിച്ചുവിട്ടത്. അടിയന്തരാവസ്ഥക്കെതിരെ പോരാടി ജയില്വാസം അനുഭവിച്ചവരെ ആദരിക്കലും പുസ്തകപ്രകാശനവുമാണ് നിശ്ചയിച്ചിരുന്നത്. മൂന്നുമണിയോടെ സെനറ്റ്ഹാളില് ഒരുക്കങ്ങള് പൂര്ത്തിയായി. വേദിയില് ഭാരതാംബയുടെ ചിത്രം വച്ചിട്ടുണ്ടെന്ന് സിപിഎം സന്ദേശവാഹകര് എകെജി സെന്ററിലേക്ക് സന്ദേശം എത്തിച്ചതോടെയാണ് എസ്എഫ്ഐ ഗുണ്ടകള് സര്വകലാശാലയിലേക്കെത്തിയത്.
വൈകിട്ട് 4.30ന് തന്നെ എസ്എഫ്ഐക്കാര് യൂണിവേഴ്സിറ്റിക്കു മുന്നില് തമ്പടിച്ച് ഭീകരാന്തരീക്ഷം സൃഷ്ടിച്ചു. അന്പതോളം വരുന്ന ഗുണ്ടകളാണ് എത്തിയത്. എന്നാല് ഗവര്ണര് പങ്കെടുക്കുന്ന പരിപാടിയായിട്ടും നാമമാത്രമായ പോലീസിനെ മാത്രമാണ് ഈ സമയം സുരക്ഷയുടെ ഭാഗമായി എത്തിച്ചിരുന്നത്. ശ്രീപദ്മനാഭ സേവാസമിതിയുടെ ബോര്ഡുകള് നശിപ്പിക്കുകയും ഗവര്ണറെ തടയുമെന്നും ഭാരതാംബയുടെ ചിത്രം എടുത്തുമാറ്റുമെന്നും എസ്എഫ്ഐക്കാര് പ്രഖ്യാപിച്ചു. ശ്രീപദ്മനാഭസേവാസമിതിയുടെ നിരവധി പ്രവര്ത്തകര് സെനറ്റ്ഹാളിലേക്ക് എത്തിച്ചേര്ന്നതോടെ ചെറുത്തുനില്പ്പ് സംഘര്ഷത്തിലേക്കെത്തുമെന്ന് കണ്ടാണ് കൂടുതല് പോലീസിനെ എത്തിച്ചത്.
ഇതിനിടെ ഡിവൈഎഫ്ഐ നേതാവ് ഷിജുഖാന്റെ സമ്മര്ദ്ദത്തെത്തുടര്ന്ന്, ഭാരതാംബയുടെ ചിത്രം മാറ്റിയില്ലെങ്കില് പരിപാടി റദ്ദാക്കുമെന്ന് സര്വകലാശാല രജിസ്ട്രാര് ഡോ. കെ.എസ്.അനില്കുമാര് ഭീഷണി ഉയര്ത്തി. ഭാരതാംബയുടെ ചിത്രം ഉള്ളതിനാല് അനുമതി റദ്ദാക്കുന്നുവെന്ന് എഴുതിത്തരണമെന്ന് സംഘാടകര് ആവശ്യപ്പെട്ടതോടെ രജിസ്ട്രാര് പിന്വാങ്ങി. ഇതിനിടയില് യൂണിവേഴ്സിറ്റിക്കു മുന്നില് എസ്എഫ്ഐക്കാര് പലവട്ടം സംഘര്ഷാന്തരീക്ഷം സൃഷ്ടിച്ചു. എന്നാല് 6.30 ഓടെ നിശ്ചയിച്ച പരിപാടിയില് മാറ്റമില്ലെന്നും കീഴടങ്ങുന്ന പ്രശ്നമില്ലെന്നും അറിയിച്ച് ഗവര്ണറുടെ വാഹനമെത്തി. പ്രധാന ഗേറ്റിലൂടെയാണ് ഗവര്ണര് എത്തിച്ചേര്ന്നത്. ഈ സമയവും എസ്എഫ്ഐക്കാര് പ്രധാനഗേറ്റിനു സമീപം വിശ്വസ്ത പോലീസുകാര്ക്കിടയില് മുദ്രാവാക്യം മുഴക്കി നില്ക്കുന്നുണ്ടായിരുന്നു.
ഗവര്ണര് സെനറ്റ്ഹാളിലെ പരിപാടിയില് പങ്കെടുത്ത് തിരികെയിറങ്ങുമ്പോള് തടയുമെന്നായി എസ്എഫ്ഐക്കാര്. പ്രധാനഗേറ്റില് ഗവര്ണര്ക്കെതിരെ ബാനര് ഉയര്ത്തി ഗേറ്റിന് മുന്വശം റോഡില് കുത്തിയിരുന്ന് എസ്എഫ്ഐക്കാര് മുദ്രാവാക്യം വിളിച്ചു. പരിപാടി സമാപിച്ചപ്പോള് ഗവര്ണറെ എകെജി സെന്ററിന് സമീപമുള്ള ഗേറ്റിലൂടെ പുറത്തിറക്കി പുതിയ എകെജി സെന്ററിന് മുന്നിലൂടെ രാജ്ഭവനിലേക്ക് മടങ്ങി. ഇതോടെ എസ്എഫ്ഐക്കാര് പ്രകടനം നടത്തി പോലീസ് അകമ്പടിയില് പിരിഞ്ഞുപോയി.
