തിരുവനന്തപുരം : ഭാരതാംബ ചിത്രം ഔദ്യോഗിക പരിപാടികളില്‍ വയ്‌ക്കുന്നതില്‍ എതിര്‍പ്പുമായി മുഖ്യമന്ത്രി പിണറായി വിജയന്‍. ഇക്കാര്യം ചൂണ്ടിക്കാട്ടി ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ക്ക് കത്തയച്ചു.
കാവിക്കൊടിയേന്തിയ ഭാരതാംബ പോലുളള ബിംബങ്ങള്‍ ഭരണഘടനാ വിരുദ്ധമാണെന്നാണ് മുഖ്യമന്ത്രി കത്തില്‍ പറയുന്നത്.ഭരണഘടന പ്രകാരമുളള ദേശീയ ചിഹ്നങ്ങള്‍ മാത്രമേ ഉപയോഗിക്കാവൂ.
മതേതരത്വത്തെ വെല്ലുവിളിക്കുന്ന ചിഹ്നങ്ങള്‍ പാടില്ല. ഔദ്യോഗിക പരിപാടികളില്‍ ഇത് കര്‍ശനമാക്കണമെന്നും ഇതിന് വിരുദ്ധമായ സാഹചര്യം ഉണ്ടാകരുതെന്നും മുഖ്യമന്ത്രി കത്തില്‍ ആവശ്യപ്പെടുന്നു. മുഖ്യമന്ത്രിയുടെ കത്തിന് മറുപടി നല്‍കാനൊരുങ്ങുകയാണ് രാജ്ഭവന്‍.
കഴിഞ്ഞ ദിവസം പാളയത്ത് കേരള സര്‍വകലാശാല വളപ്പിലെ സെനറ്റ് ഹാളില്‍ നടന്ന പരിപാടിയില്‍ ഭാരതാംബ ചിത്രം വച്ചതിനെതിരെ എസ് എഫ് ഐയും കെ എസ് യുവും രംഗത്ത് വന്നിരുന്നു.പരിപാടിയില്‍ പങ്കെടുക്കാന്‍ എത്തിയ ഗവര്‍ണറെ തടയാനും ശ്രമമുണ്ടായെങ്കിലും ഫലമുണ്ടായില്ല.പരിപാടിയില്‍ ഭാരതാംബ ചിത്രം വയ്‌ക്കുന്നതില്‍ രജിസ്ട്രാര്‍ എതിര്‍പ്പറിയിച്ചപ്പോള്‍ ഭാരതാംബ ഏത് മത ചിഹ്നമാണെന്ന് ഗവര്‍ണര്‍ ചോദിച്ചിരുന്നു.
പ്രതികരിക്കാൻ ഇവിടെ എഴുതുക: