കൊച്ചി: “ഒരു വക്കീലിനോട് സംസാരിക്കാം…പക്ഷെ ഒരു താന്തോന്നിയോട്”- നടന് ജോയ് മാത്യുവിന്റെ കഥാപാത്രം ഈ ഡയലോഗ് പറയുന്നത് സുരേഷ് ഗോപിയെക്കുറിച്ചാണ്. ജെഎസ് കെ എന്ന ചുരുക്കപ്പേരില് അറിയപ്പെടുന്ന ജാനകി വേഴ്സസ് സ്റ്റേറ്റ് ഓഫ് കേരള എന്ന സിനിമയില് നായകനായ സുരേഷ് ഗോപി എത്തുന്നത് താന്തോന്നിയായ വക്കീല് വേഷത്തിലാണ്.
പത്രക്കാര് മള്ടി താപ്പുകാരെന്ന് സുരേഷ് ഗോപി
താന്തോന്നി എന്ന് വിളിക്കപ്പെടാന് തനിക്ക് ഇഷ്ടമാണെന്നും ജെഎസ് കെയില് താന്തോന്നിയായ വക്കീലായി അഭിനയിക്കുന്നതില് സന്തോഷമുണ്ടെന്നും സുരേഷ് ഗോപി പേളി മാളി നടത്തിയ അഭിമുഖത്തില് പറയുന്നു.
“ഈ സിനിമയില് ഞാന് ചെയ്യുന്നത് വക്കീല് പ്പണിയാണ്. ജെഎസ് കെയില് ഞാന് പത്രക്കാരോട് പറയുന്ന ഡയലോഗുണ്ട്. എനിക്ക് ഇരട്ടത്താപ്പാണെങ്കില് നിങ്ങല് മള്ട്ടിത്താപ്പുകാരാണ്. നിങ്ങള്ക്ക് മനസാക്ഷിയില് ഉറപ്പുണ്ടെങ്കില് നിങ്ങള്ക്ക് ഏത് വഴിയും സ്വീകരിക്കാം. എന്റെ കഥാപാത്രങ്ങള് എല്ലാം അങ്ങിനെയുള്ളത്.
ഉന്നതോദ്യോഗസ്ഥരോടും സ്ഥാപനങ്ങളോടും ഫൈറ്റ് ചെയ്യുന്ന കഥാപാത്രങ്ങളാണ് അധികവും.” – സുരേഷ് ഗോപി പറഞ്ഞു.
കോളെജില് പഠിക്കുമ്പോള് അന്തര്മുഖന്
പത്രക്കാരോട്, ജനങ്ങളോട് തന്റേടത്തോടെ കാര്യം പറയുന്ന, ഇലക്ഷന് പ്രചാരണത്തിന്റെ കലാശക്കൊട്ടില് കയ് മെയ് മറന്ന് പ്രവര്ത്തകര്ക്കൊപ്പം ഡാന്സ് ചെയ്യുന്ന സുരേഷ് ഗോപിയെ നമ്മള് കണ്ടിട്ടുണ്ട്. പക്ഷെ പേളി മാണിയുടെ ഒരു ചോദ്യത്തിന് ഉത്തരമായി സുരേഷ് ഗോപി വെളിപ്പെടുത്തുന്ന സത്യം ഇതാണ്:” “ഞാന് കോളെജില് പഠിക്കുമ്പോള് ഒരു ഇന്ട്രൊവെര്ട്ട് (അന്തര്മുഖന്) ആയിരുന്നു. ഒരിയ്ക്കലും വിദ്യാര്ത്ഥികളുടെ ഇടയില് പോലും ഞാന് മുന്നിരയില് വന്നിട്ടില്ല. കൂട്ടുകാരുടെ പിന്നില് നില്ക്കാനായിരുന്നു എപ്പോഴും ഇഷ്ടപ്പെട്ടത്”. – സുരേഷ് ഗോപി പറഞ്ഞു.
സുരേഷ് ഗോപിയുടെ പഞ്ചാരവണ്ടി
കോളെജില് പഠിക്കുമ്പോള് സുരേഷ് ഗോപി സൈക്കിള് ഉപയോഗിച്ചിരുന്നു. “പഞ്ചാരവണ്ടി എന്ന പേരാണ് എന്റെ സൈക്കിളിന്. പച്ച മെറ്റാലിക് കളറിലുള്ള ഹാമില്ട്ടണ് സൈക്കിളായിരുന്നു. ക്വാവാഡിസ് ഷൂ ആണ് ഉപയോഗിച്ചിരുന്നത്. നടക്കുമ്പോള് ഷൂസ് പ്രത്യേകരീതിയില് ശബ്ദമുണ്ടാക്കും. കോളെജ് വരാന്തയില് എന്റെ ക്വാവാഡിസ് ഷൂസിന്റെ ശബ്ദം കേട്ട് കുട്ടികള് പുറത്തേക്ക് നോക്കും. അവര്ക്കറിയാം അത് ഞാനാണെന്ന്.”- സുരേഷ് ഗോപി പറയുന്നു.
മലയാളം പറഞ്ഞതിന് 25 പൈസ വരെ പിഴ കൊടുത്ത സുരേഷ് ഗോപി
“ഇന്ഫാന്റ് ജീസസ് സ്കൂളില് ആയിരുന്നു പഠിച്ചിരുന്നത്. സ്കൂളില് ഭയങ്കര സ്ട്രീക്റ്റ് കണ്ടീഷനായിരുന്നു മലയാളം സംസാരിച്ചാല് അഞ്ച് പൈസ, പത്ത് പൈസ എന്നിങ്ങനെ പിഴ ചുമത്തും. എനിക്ക് 25 പൈസ വരെ പിഴ നല്കേണ്ടിവന്നിട്ടുണ്ട്.” – സുരേഷ് ഗോപി പറയുന്നു.
മലയാളം പഠിപ്പിച്ചത് എംടി
“എന്നെ മലയാളം പഠിപ്പിച്ചത് എം.ടി. വാസുദേവന് നായരാണ്. വടക്കന് വീരഗാഥയുടെ ഡബ്ബിംഗ് നടക്കുമ്പോള് എംടി ഭ എന്ന അക്ഷരം എങ്ങിനെ ഉച്ചരിക്കണമെന്ന് പഠിപ്പിയ്ക്കും. സുരേഷ്… പറയൂ…ഭ…ഭാര്യ…’ഭ’യും ‘ഹ’യും കൂടി ചേര്ത്ത് പറയൂ ഭ….പലപ്പോഴും ഞാന് ബാര്യ എന്നായിരുന്നു പറഞ്ഞിരുന്നു. നിനക്ക് പോ പുല്ലേ മാത്രമേ വരൂ.എന്ന വരെ എംടി പറയും. വാക്കുകള്ക്ക് സ്ട്രെസ് എവിടെ കൊടുക്കണം എന്ന് എംടി പറഞ്ഞു തന്നു. …
മലയാളികളുടെ മനം കവര്ന്നത് രണ്ജി പണിക്കരുടെ ഡയലോഗുകള്
പിന്നെ രണ്ജി പണിക്കരുടെ കയ്യില് ചെന്ന് വീണു….അവന് എഴുതുന്ന ഡയലോഗുകള് പെര്ഫെക്ട് മീറ്ററിലാണ്. ശ്വാസം കിട്ടാതെ ഡയലോഗ് പറയുമ്പോള് കഴുത്തില് ഞെരമ്പ് എഴുന്നെള്ളിവരും…വാസ്തവത്തില് ഒറ്റശ്വാസത്തില് പറയുമ്പോഴാണ് കഴുത്തിലെ ഞരമ്പ് തള്ളി വരുന്നത്. പിന്നീട് രോഷം കൊള്ളുന്ന ഡയലോഗുകള് പറയുമ്പോള് ജോഷിയേട്ടന് ഓര്മ്മിപ്പിച്ചു (സംവിധായകന് ജോഷി) ഡാ ഇത് തള്ളിയില്ലല്ലോ….എന്ന്. ജോഷിയേട്ടന്റെ വിചാരം എല്ലാ ദേഷ്യപ്പെടുന്ന ഡയലോഗിലും കഴുത്തിലെ ഞരമ്പ് തള്ളുമെന്നാണ്.”- പൊട്ടിച്ചിരിച്ചുകൊണ്ട് സുരേഷ് ഗോപി പറയുന്നു.
