ഒരുപാട് വ്യത്യസ്തതകള്‍ നിറഞ്ഞതാണ് ഇന്ത്യന്‍ ഭക്ഷണം. ഇക്കാര്യത്തില്‍ ഉത്തരേന്ത്യയും ദക്ഷിണേന്ത്യയും തമ്മില്‍ വലിയ അന്തരമുണ്ട്. ഈ വ്യത്യസ്തതകള്‍ക്കെല്ലാം പുറമേ പ്രാദേശികമായി തുടര്‍ന്നുപോരുന്ന പാചകരീതികള്‍ വേറെയും. ഇത്തരത്തില്‍ ഒന്നാണ് ഉറുമ്പ് ചമ്മന്തി. രുചിയും പോഷകഗുണവുമുള്ള ഈ സൂപ്പര്‍ ഫുഡ് ഒഡീഷയുടെ മയൂര്‍ഭഞ്ച് ജില്ലയുടെ സ്വന്തമാണ്.
ഒഡീഷയ്‌ക്ക് പുറമെ ഛത്തീസ്ഗഢിലെയും, ജാര്‍ഖണ്ഡിലെയും ചില പ്രദേശങ്ങളില്‍ ചമ്മന്തികളില്‍ പ്രധാന ചേരുവയായി ഉറുമ്പുകളെ ഉപയോഗിക്കാറുണ്ട്. ഇഞ്ചി, വെളുത്തുള്ളി, മല്ലിയില, ഏലം, പുളി, ഉപ്പ് എന്നിവ കൂടി ചേര്‍ത്താണ് ചമ്മന്തി തയ്യാറാക്കുന്നത്. പാചകത്തിനു മുന്‍പ് ഉറുമ്പുകളെയും അവയുടെ മുട്ടകളെയും ഉണക്കിയെടുക്കുന്നു.
പ്രോട്ടീന്‍, ഫൈബര്‍ എന്നിവയുടെ കലവറയാണ് ഉറുമ്പുകള്‍. അയണ്‍, സിങ്ക് , മഗ്‌നീഷ്യം, പൊട്ടാസ്യം തുടങ്ങിയവയും ഉറുമ്പുകളിലുണ്ട്. ബുദ്ധിവികാസത്തിനും ഓര്‍മ്മശക്തിയ്‌ക്കും അത്യുത്തമമാണ് ഈ ചമ്മന്തിയെന്നും വിശ്വസിക്കപ്പെടുന്നു. മയൂര്‍ഭഞ്ചിലെ ഗോത്ര കുടുംബങ്ങളില്‍ ഉറുമ്പുകളെ വനത്തില്‍ നിന്നു ശേഖരിച്ച് ചമ്മന്തിയുണ്ടാക്കി വില്‍പന നടത്തി ഉപജീവനം കണ്ടെത്തുന്നവരുമുണ്ട്.
പ്രതികരിക്കാൻ ഇവിടെ എഴുതുക