മുണ്ടക്കയം: തലചായ്‌ക്കാന്‍ ഒരിടം പദ്ധതിയില്‍ കൂട്ടിക്കല്‍ പഞ്ചായത്തിലെ കൊടുങ്ങയില്‍ സേവാഭാരതി തണലൊരുക്കിയപ്പോള്‍ സുഗതനും ശ്യാമളയ്‌ക്കും തെല്ലൊന്നുമല്ല ആശ്വാസമായത്. കഴിഞ്ഞ നാലുവര്‍ഷം ഇവര്‍ താമസിച്ചത് വാടകവീട്ടില്‍ ആയിരുന്നു. അതാതു മാസം വാടക കൊടുക്കാന്‍ ഒരുപാടു വിഷമിച്ചു, എഴുപതാം വയസ്സിലും വഴിനീളെ ലോട്ടറി വിറ്റുകിട്ടുന്ന വരുമാനമായിരുന്നു ഏക ജീവിതമാര്‍ഗം. വടക്കേമലയില്‍ താമസിച്ചിരുന്ന വീട് ഉരുളില്‍ നഷ്ടപ്പെട്ടപ്പോള്‍ ആയിരുന്നു വാടകയ്‌ക്ക് മാറിയത്.
സേവാഭാരതി തണല്‍ ഒരുക്കിയ വീട്ടില്‍ ഒരു രാവ് പിന്നിട്ടപ്പോള്‍ ഈ ദമ്പതികള്‍ക്ക് ആശ്വാസ രാത്രിയായിരുന്നു കടന്നുപോയത്. അടച്ചുറപ്പുള്ള വീട്ടില്‍ ഇനി ഞങ്ങള്‍ക്ക് സുഖമായി അന്തിയുറങ്ങാം. വാടക എന്ന ബാധ്യതയില്‍ നിന്നും മോചനവുമായി. പുതിയ ജീവിതവും പുതിയ പ്രതീക്ഷകളുമായാണ് ഈ ദിനം ഇവരെ വരവേറ്റത്. നയന മനോഹരമായ വാഗമണ്‍ മലനിരകളാണ് അങ്ങകലെ കാണാന്‍ കഴിയുന്നത്.
മകള്‍ക്കും മരുമകനും ഒപ്പം പൂച്ചെടികള്‍ നട്ടു പിടിപ്പിച്ചാണ് ആദ്യദിനം കടന്നുപോകുന്നത്. കണ്ണുകളില്‍ ആശ്വാസവും പുതിയ പ്രതീക്ഷയുമായാണ് ഇവര്‍ ഇനി മുന്നോട്ട് പോകുക.
പ്രതികരിക്കാൻ ഇവിടെ എഴുതുക: