താഷ്കെന്റ് : ഉസ്ബെകിസ്ഥാനിലെ താഷ്കെന്റില് നടക്കുന്ന ഊസ് ചെസ്സ് ചാമ്പ്യന്ഷിപ്പില് സിന്ഡൊറോവിനെ തോല്പിച്ച് തകര്പ്പന് പ്രകടനത്തിലൂടെ നാല് റൗണ്ട് പിന്നിട്ട ടൂര്ണ്ണമെന്റില് മൂന്ന് പോയിന്റുകള് നേടി പ്രജ്ഞാനന്ദ മുന്നില്. ഇനി ഒരു റൗണ്ട് കൂടിയേ ബാക്കിയുള്ളൂ.
ഈ വിജയത്തോടെ പ്രജ്ഞാനന്ദയുടെ ലൈവ് റേറ്റിംഗ് 2779.9 ആയി ഉയര്ന്നു. മാത്രമല്ല, ലൈവ് റേറ്റിംഗ് പ്രകാരം പ്രജ്ഞാനന്ദയുടെ ലോക റാങ്കിങ്ങ് അഞ്ചായി. ഗുകേഷിനെ പിന്തള്ളി ഏഴാം സ്ഥാനത്ത് നിന്നാണ് പ്രജ്ഞാനന്ദ അഞ്ചാം സ്ഥാനത്തേക്ക് ഉയര്ന്നത്.
ഇതോടെ അദാനിയുടെ സ്പോണ്സര്ഷിപ്പിപ്പ് സാര്ത്ഥമായി എന്ന രീതിയില് ചില കമന്റുകള് ഉയരുകയാണ്. അദാനിഗ്രൂപ്പ് ആണ് ഇപ്പോള് പ്രജ്ഞാനന്ദയുടെ സ്പോണ്സര്മാര്. ഇദ്ദേഹത്തിന്റെ യാത്ര, താമസം, പരിശീലനച്ചെലവ് തുടങ്ങിയവ വഹിക്കുന്നത് അദാനിയാണ്. പകരം അദാനി എന്ന ബ്രാന്റ് നാമം പ്രജ്ഞാനന്ദ തന്റെ കോട്ടിന്റെ കയ്യില് തുന്നിച്ചേര്ത്തിരിക്കുന്നു. 2024 ജനവരി 5നാണ് അദാനി ഗ്രൂപ്പ് പ്രജ്ഞാനന്ദയെ സ്പോണ്സര് ചെയ്യാന് ആരംഭിച്ചത്. ഗര്വ്വ് ഹൈ (അഹങ്കാരം ഉണ്ട്…) എന്ന പേരില് മികച്ച കായികതാരങ്ങളെ പ്രോത്സാഹിക്കുന്ന പദ്ധതിയുടെ ഭാഗമായാണ് അദാനി ഗ്രൂപ്പ് പ്രജ്ഞാനന്ദയെ സ്പോണ്സര് ചെയ്യാന് തുടങ്ങിയത്.
ഇപ്പോഴിതാ അദാനിക്ക് അതിന്റെ മൂല്യം തിരിച്ചുകിട്ടുകയാണ്. കാരണം തന്റെ കളിയുടെ നിലവാരം തുടര്ച്ചയായി മുകളിലേക്ക് ഉയര്ത്താന് ശ്രമിക്കുന്ന ഒരു താരമായി പ്രജ്ഞാനന്ദ മാറിയിരിക്കുന്നു. 2025ല് ടാറ്റാ സ്റ്റീല് കപ്പ്, റൊമാനിയയില് നടന്ന സൂപ്പര് ബെറ്റ് ഗ്രാന്റ് ചെസ് ക്ലാസിക്കല് ചാമ്പ്യന്ഷിപ്പ് എന്നിവ നേടിയിരുന്നു. സ്റ്റെപ്പാന് അവഗ്യന് മെമ്മോറിയല് ചെസ്സില് രണ്ടാം സ്ഥാനവും നേടി.
