തിരുവനന്തപുരം: നിരവധി ക്രിമിനല് കേസുകളില് പ്രതിയായി കാപ്പ ആക്ട് പ്രകാരം നാടുകടത്തിയ യുവാവ് നാട്ടില് തിരികെയെത്തിയതിനു പിന്നാലെ അറസ്റ്റ് ചെയ്ത് പൊലീസ്. ഉഴമലയ്ക്കല് കുളപ്പടശ്രുതി ഭവനില് ശ്രീലാലി(26)നെയാണ് ആര്യനാട് പൊലീസ് പിടികൂടിയത്.
ആര്യനാടും സമീപ പൊലീസ് സ്റ്റേഷന് പരിധിയിലും കവര്ച്ച, വധശ്രമം തുടങ്ങി നിരവധി ക്രിമിനല് കേസുകളില് ഉള്പ്പെട്ട പ്രതിയും കാപ്പാ നിയമ പ്രകാരം മുന്പ് കരുതല് തടങ്കലില് കഴിഞ്ഞിരുന്നയാളുമാണ് ശ്രീലാല്. ജയില് മോചിതനായി വീണ്ടും കുറ്റകൃത്യങ്ങളില് ഏര്പ്പെട്ടതോടെയാണ് മാസങ്ങള്ക്ക് മുമ്പ് ഇയാളെ ജില്ലയ്ക്ക് പുറത്തേക്ക് കടത്തിയത്.
ഏപ്രില് മുതല് ആറ് മാസത്തേക്ക് തിരുവനന്തപുരം ജില്ലയില് പ്രവേശിക്കാന് പാടില്ലെന്ന തിരുവനന്തപുരം റെയ്ഞ്ച് ഡിഐജിയുടെ ഉത്തരവ് നിലവിലുണ്ട്.ഇങ്ങനെയിരിക്കെ ഇയാളെ ആര്യനാടും പരിസരത്തും കണ്ടതായി വിവരം ലഭിച്ചു. രഹസ്യ വിവരം ലഭിച്ച പ്രകാരം ആര്യനാട് പൊലീസ് നടത്തിയ പരിശോധനയില് ആര്യനാട്-നെടുമങ്ങാട് റൂട്ടിലെ കൊങ്ങണത്ത് നിന്നും പ്രതിയെ സാഹസികമായി പിടികൂടി. കോടതിയില് ഹാജരാക്കി ഇയാളെ റിമാന്ഡ് ചെയ്തു .
