കൊച്ചി : പാതിവില തട്ടിപ്പ് കേസില് പ്രതി സത്യ സായി ട്രസ്റ്റ് എക്സിക്യൂട്ടീവ് ഡയറക്ടര് കെ എന് ആനന്ദകുമാറിന് രണ്ട് കേസുകളില് ജാമ്യം. കരീലക്കുളങ്ങര പൊലീസ് രജിസ്റ്റര് ചെയ്ത് ക്രൈംബ്രാഞ്ച് അന്വേഷിക്കുന്ന കേസുകളിലാണ് ജാമ്യം. പ്രായമായെന്നതും രോഗിയാണെന്നതും പരിഗണിച്ചാണ് ജസ്റ്റിസ് ബെച്ചു കുര്യന് തോമസ് അധ്യക്ഷനായ സിംഗിള് ബെഞ്ച് ജാമ്യം അനുവദിച്ചത്.
സര്ദാര് പട്ടേല് റിസര്ച്ച് ഇന്സ്റ്റിറ്റ്യൂട്ട് വഴി പകുതി വിലയ്ക്ക് സ്കൂട്ടറും ഗൃഹോപകരണങ്ങളും നല്കാമെന്ന് വാഗ്ദാനം നല്കി അറുപതിനായിരം രൂപ തട്ടിയെടുത്തുവെന്ന കേസിലാണ് ജാമ്യം. പാതിവില തട്ടിപ്പുമായി ബന്ധപ്പെട്ട് ആയിരത്തിലധികം കേസുകളാണ് സംസ്ഥാനത്തിന്റെ വിവിധ ഭാഗങ്ങളില് പൊലീസ് രജിസ്റ്റര് ചെയ്തത്.
പ്രധാന പ്രതിയായ കെഎന് ആനന്ദ കുമാര് റിമാന്ഡില് കഴിയുകയാണ്. രണ്ട് കേസുകളില് ജാമ്യം ലഭിച്ചുവെങ്കിലും മറ്റ് കേസുകളില് കൂടി ജാമ്യം ലഭിക്കാതെ ജയിലില് നിന്ന് പുറത്തിറങ്ങാനാവില്ല.
