മുംബൈ : പഹൽഗാം ഭീകരാക്രമണം നടത്തിയവരെ മുസ്ലീങ്ങളായി കണക്കാക്കാൻ പറ്റില്ലെന്ന് നടൻ ആമിർ ഖാൻ . ഒരു മതവും ആളുകളെ കൊല്ലാൻ ഉപദേശിക്കുന്നില്ലെന്നും സ്വകാര്യ ചാനലിന്റെ പ്രത്യേക പരിപാടിയിൽ പങ്കെടുക്കവേ ആമിർ ഖാൻ പറഞ്ഞു .
‘ പഹൽഗാം ഭീകരാക്രമണം അതിക്രൂരമായിരുന്നു , നമ്മുടെ രാജ്യത്ത് അതിക്രമിച്ചു കയറി സാധാരണക്കാർക്ക് നേരെ വെടിയുതിർത്ത ഭീകരവാദികളുടെ ഭീരുത്വമാണ് ഇത് കാണിക്കുന്നത് . അവർ ആളുകളുടെ മതം ചോദിച്ച് വെടിയുതിർത്തു , ഇതിന്റെ അർത്ഥമെന്താണ് ? ഒരു മതവും ആളുകളെ കൊല്ലാൻ ആവശ്യപ്പെടുന്നില്ല . ഈ ഭീകരരെ മുസ്ലീങ്ങളായി കണക്കാക്കാനാകില്ല . കാരണം നിരപരാധികളായ ഒരു മനുഷ്യനെയും കൊല്ലാൻ പാടില്ലെന്നും , സ്ത്രീകളെയും, കുട്ടികളെയും ആക്രമിക്കരുതെന്നും ഇസ്ലാമിലുണ്ട്. അത് ചെയ്യുന്നതിലൂടെ അവർ മതത്തിന് എതിരാകുകയാണ് ‘ – ആമിർ ഖാൻ പറയുന്നു.
ഇന്ത്യൻ സായുധസേനയിൽ തനിക്ക് അഭിമാനമുണ്ടെന്നും ആമിർ ഖാൻ പറഞ്ഞു. കാർഗിൽ യുദ്ധശേഷം താൻ സൈനികരെ സന്ദർശിച്ചിരുന്നു, അതിനെ കുറിച്ച് അധികമാർക്കും അറിയില്ല . എല്ലാ റെജിമെന്റും താൻ സന്ദർശിച്ചതായും ആമിർ ഖാൻ പറയുന്നു.
“കാർഗിൽ യുദ്ധം നടന്നപ്പോഴും നാം വിജയിച്ചപോഴും ഞാൻ കാർഗിലിൽ പോയി, അവരെ പ്രോത്സാഹിപ്പിക്കാനാണ് ഞാൻ അന്ന് പോയത്. നിങ്ങൾ ഞങ്ങൾക്ക് വേണ്ടി യുദ്ധം ചെയ്തു. ഞങ്ങളെ സംരക്ഷിച്ചു. ഞാൻ നിങ്ങളെ സല്യൂട്ട് ചെയ്യുന്നു. ഞാൻ നിങ്ങളോട് കടപ്പെട്ടിരിക്കുന്നു.
” നമ്മുടെ സൈനികർക്ക് യഥാർത്ഥത്തിൽ പ്രോത്സാഹനം ആവശ്യമില്ല. അത്തരം ദുർഘടമായ പ്രദേശങ്ങളിൽ ജീവിച്ച് അവർ നമ്മളെ സംരക്ഷിക്കുന്നു.എങ്കിലും അവരുടെ മനോവീര്യം അവിശ്വസനീയമാണ്. അവരുടെ മനോവീര്യം വർദ്ധിപ്പിക്കാനാണ് ഞാൻ അവിടെ പോകുന്നതെന്ന് ഞാൻ വിചാരിച്ചു, എന്നാൽ പകരം അവർ എന്റെ മനോവീര്യം വർദ്ധിപ്പിച്ചു.“ എന്നും ആമിർ ഖാൻ പറഞ്ഞു.
പ്രതികരിക്കാൻ ഇവിടെ എഴുതുക: