ജറുസലേം: ഇറാനും ഇസ്രായേലും തമ്മിലുള്ള യുദ്ധം ഇപ്പോൾ അതിരൂക്ഷമാണ്. ഇരു രാജ്യങ്ങളും പരസ്പരം ആക്രമിക്കുകയാണ്. ഇസ്രായേലിന്റെ ആക്രമണങ്ങൾക്ക് മറുപടിയായി ഇറാൻ ബാലിസ്റ്റിക് മിസൈലുകൾ ഉപയോഗിച്ച് ആക്രമണം നടത്തി.
അതേസമയം ഇറാൻ ഒരു വലിയ അവകാശവാദം ഉന്നയിച്ചിട്ടുണ്ട്. ഇസ്രായേലിന്റെ രണ്ട് നൂതന എഫ്-35 യുദ്ധവിമാനങ്ങൾ വെടിവച്ചിട്ടതായിട്ടാണ് ഇറാൻ അവകാശപ്പെട്ടിരിക്കുന്നത്. ഈ വിമാനങ്ങളിലൊന്നിൽ നിന്ന് പാരച്യൂട്ട് വഴി ഇറങ്ങിയ ഒരു വനിത പൈലറ്റിനെയും പിടികൂടിയതായി ഇറാൻ അവകാശപ്പെട്ടു. ഇറാന്റെ സ്റ്റേറ്റ് മീഡിയ പ്രകാരം വെള്ളിയാഴ്ച ഇറാനിയൻ വ്യോമ പ്രതിരോധ സംവിധാനം അവരുടെ വ്യോമാതിർത്തിയിൽ പ്രവേശിച്ചപ്പോൾ ഈ വിമാനങ്ങൾ വെടിവച്ചു വീഴ്‌ത്തിയതെന്നാണ് പ്രസ്താവന.
എന്നാൽ ഇസ്രായേൽ പ്രതിരോധ സേന (ഐഡിഎഫ്) ഇറാന്റെ അവകാശവാദങ്ങൾ നിഷേധിച്ചു. ഇറാന്റെ അവകാശവാദം ഇസ്രായേൽ പ്രതിരോധ സേന നിരാകരിക്കുകയും അത് പൂർണ്ണമായും അടിസ്ഥാനരഹിതമാണെന്ന് പറയുകയും ചെയ്തു. ഇത് ഇറാനിയൻ മാധ്യമങ്ങളുടെ തെറ്റായ പ്രചാരണമാണെന്ന് ഇസ്രായേൽ പ്രതിരോധ സേന വക്താവ് കേണൽ അവിചായ് അദ്രേ പറഞ്ഞു.
അതേ സമയം എഫ്-35 പോലുള്ള ഒരു സ്റ്റെൽത്ത് ഫൈറ്റർ വിമാനം നശിപ്പിച്ചുവെന്ന അവകാശവാദം ശരിയാണെങ്കിൽ അത് ഇറാന്റെ വലിയ സൈനിക നേട്ടമായിരിക്കും. എഫ്-35 ലോകത്തിലെ ഏറ്റവും ആധുനിക ഫൈറ്റർ വിമാനങ്ങളിൽ ഒന്നാണ്. എന്നിരുന്നാലും ഇറാന്റെ അവകാശവാദത്തെ ഇസ്രായേൽ നിരാകരിക്കുകയും അത് വ്യാജവും തെറ്റിദ്ധരിപ്പിക്കുന്നതുമാണെന്ന് വിശേഷിപ്പിക്കുകയും ചെയ്തു. തങ്ങളുടെ ജനങ്ങളിൽ ആവേശം വളർത്തുന്നതിനാണ് ഇറാൻ ഇത്തരമൊരു അവകാശവാദം ഉന്നയിക്കുന്നതെന്ന് ഇസ്രായേൽ വിശ്വസിക്കുന്നത്.
കഴിഞ്ഞ വെള്ളിയാഴ്ചയാണ് ഇറാന്റെ ആണവ, സൈനിക താവളങ്ങൾ ഇസ്രായേൽ ആക്രമിച്ചത്. അതിന് മറുപടിയായി ഇറാനും തിരിച്ചടിച്ചു. ഇസ്രായേലിലെ നിരവധി നഗരങ്ങളെ ഇറാൻ ബാലിസ്റ്റിക് മിസൈലുകൾ ഉപയോഗിച്ച് ആക്രമിച്ചു. ഇറാന്റെ ആക്രമണങ്ങളിൽ മധ്യ ഇസ്രായേലിലെ നിരവധി വീടുകളും വാഹനങ്ങളും തകർന്നിട്ടുണ്ട്. നേരെമറിച്ച് ഇറാന്റെ നിരവധി മുതിർന്ന സൈനിക കമാൻഡർമാരും ആണവ ശാസ്ത്രജ്ഞരും ഇസ്രായേലിന്റെ ആക്രമണങ്ങളിൽ കൊല്ലപ്പെട്ടിട്ടുണ്ട്.
പ്രതികരിക്കാൻ ഇവിടെ എഴുതുക