പട്ന : സ്ത്രീധനം വാങ്ങുന്നത് നിയമപ്രകാരം കുറ്റകരമാണെന്ന് ഇപ്പോൾ പറയപ്പെടുന്നുണ്ടെങ്കിലും, ചില സ്ഥലങ്ങളിൽ ഈ ഇടപാടുകളെല്ലാം രഹസ്യമായാണ് നടക്കുന്നത്. എന്നാൽ , ബീഹാറിലെ ഒരു വിവാഹത്തിന് സ്ത്രീധനം നൽകാനാകാത്ത യുവതിയിൽ നിന്ന് ഭർതൃവീട്ടുകാർ ആവശ്യപ്പെട്ടത് വൃക്കയാണ് . വൃക്കരോഗിയായ ഭർത്താവിന് സ്ത്രീധനമായി വൃക്ക നൽകണമെന്ന് പറഞ്ഞ് ഭർതൃമാതാപിതാക്കൾ യുവതിയെ പീഡിപ്പിക്കുന്നുവെന്നാണ് യുവതി പൊലീസിൽ നൽകിയ പരാതി.
വടക്കൻ ബീഹാറിലെ മുസാഫർപൂരിലാണ് സംഭവം . ദീപ്തി എന്ന സ്ത്രീയാണ് മുസാഫർപൂർ വനിതാ പോലീസ് സ്റ്റേഷനിൽ പരാതി നൽകിയത്. 2021 ലാണ് യുവതി വിവാഹം കഴിച്ചത് . തുടക്കത്തിൽ, പ്രശ്നങ്ങൾ ഒന്നും ഉണ്ടായിരുന്നില്ല . പക്ഷേ പിന്നീട് ഭർതൃമാതാപിതാക്കൾ യുവതിയെ മാനസികമായി പീഡിപ്പിക്കാനും ശാരീരികമായി ഉപദ്രവിക്കാനും തുടങ്ങി. ആദ്യമൊക്കെ വീട്ടിൽ നിന്ന് സ്ത്രീധനമായി ബൈക്കും പണവും കൊണ്ടുവരാൻ ആവശ്യപ്പെട്ടവർ പിന്നീട് മകനുവേണ്ടി വൃക്ക നൽകാനാണ് യുവതിയോട് ആവശ്യപ്പെട്ടത്.വിവാഹം കഴിഞ്ഞ് രണ്ട് വർഷത്തിന് ശേഷമാണ് യുവതി ഭർത്താവിന്റെ വൃക്ക രോഗത്തെക്കുറിച്ച് അറിഞ്ഞത്.
പീഡനം സഹിക്കാനാകാതെ യുവതി സ്വന്തം വീട്ടുകാരുടെ സഹായത്തോടെ വനിതാ പോലീസ് സ്റ്റേഷനിൽ പരാതി നൽകി. പോലീസ് ഇരുവിഭാഗത്തിനും ഇടയിൽ മധ്യസ്ഥത വഹിക്കാൻ ശ്രമിച്ചു എങ്കിലും വൃക്ക നൽകണമെന്ന ആവശ്യത്തിൽ നിന്ന് ഭർതൃവീട്ടുകാർ പിന്മാറിയില്ല . തുടർന്ന് ഭർതൃവീട്ടിലെ നാല് പേരെ പ്രതികളാക്കി പൊലീസ് കേസ് രജിസ്റ്റർ ചെയ്തു.
