ഇമ്രാൻ ഖാനും ബുഷ്റാ ബീബിയും ജയിൽ മോചിതരാകുമെന്ന് പിടിഐ നേതാവ് : അസിം മുനീർ ഇത് അനുവദിക്കുമോ എന്ന് പാക് ജനത

ഇസ്ലാമാബാദ്: പാകിസ്ഥാൻ മുൻ പ്രധാനമന്ത്രി ഇമ്രാൻ ഖാൻ ജൂൺ 11 ന് ജയിൽ മോചിതനായേക്കുമെന്ന് പാകിസ്ഥാൻ തെഹ്രീക്-ഇ-ഇൻസാഫ് (പിടിഐ) പാർട്ടിയുടെ മുതിർന്ന നേതാവ് അവകാശവാദം ഉന്നയിച്ചു. തുടർന്ന് പിടിഐ നേതാവിന്റെ പ്രസ്താവനയിൽ ഫീൽഡ് മാർഷൽ അസിം മുനീർ, ഖാന്റെ മോചനത്തിന് പിന്തുണ നൽകുമോ എന്ന ചോദ്യം ഇപ്പോൾ രാജ്യത്ത് ഉയരുന്നു.

2023 ഓഗസ്റ്റ് മുതൽ അഡിയാല ജയിലിൽ കഴിയുന്ന ഇമ്രാൻ ഖാന് ജൂൺ 11 ന് ജാമ്യം ലഭിക്കുമെന്ന് പിടിഐ പ്രസിഡന്റ് ഗൗഹർ അലി ഖാൻ ആണ് അവകാശപ്പെട്ടിരിക്കുന്നത്. ഇമ്രാന്റെ മോചനവുമായി ബന്ധപ്പെട്ട് തിരശ്ശീലയ്‌ക്ക് പിന്നിൽ ചർച്ചകൾ നടക്കുന്നുണ്ടെന്ന റിപ്പോർട്ടുകൾക്ക് പിന്നാലെയാണ് ഗൗഹറിന്റെ അവകാശവാദം.

അതേ സമയം പിടിഐ നേതാവ് ഗൗഹർ അലി ഖാന്റെ ഈ പ്രസ്താവന പ്രധാനമാണ്. കാരണം അടുത്തിടെ ഇമ്രാൻ ഖാൻ പിടിഐയുടെ രക്ഷാധികാരിയായി സ്വയം പ്രഖ്യാപിക്കുകയും ജയിലിൽ നിന്ന് രാജ്യവ്യാപകമായി ഒരു പ്രസ്ഥാനം പ്രഖ്യാപിക്കുകയും ചെയ്തു. ഇന്ത്യ ആരംഭിച്ച ഓപ്പറേഷൻ സിന്ദൂരിനുശേഷം പൊതുജനങ്ങൾക്കിടയിൽ ഇമ്രാൻ ഖാന്റെ പിന്തുണ വർദ്ധിച്ചിട്ടുണ്ട്.

അത്തരമൊരു സമയത്ത് ജയിലിൽ നിന്ന് രാജ്യവ്യാപകമായി ഒരു പ്രസ്ഥാനം പ്രഖ്യാപിച്ചുകൊണ്ട് ഇമ്രാൻ, അസിം മുനീറിനുമേൽ സമ്മർദ്ദം വർദ്ധിപ്പിച്ചിട്ടുണ്ട്. ഖാൻ ഇതുവരെ ഒന്നും വ്യക്തമാക്കിയിട്ടില്ലെങ്കിലും ഗൗഹർ ഖാന്റെ പ്രസ്താവന തീർച്ചയായും പാകിസ്ഥാനിൽ കോളിളക്കം സൃഷ്ടിച്ചിട്ടുണ്ട്. ജൂൺ 11 ഇമ്രാൻ ഖാനും അദ്ദേഹത്തിന്റെ ഭാര്യയ്‌ക്കും ഒരു പ്രധാന ദിവസമായിരിക്കുമെന്ന് ഗൗഹർ ഖാൻ പറഞ്ഞു.

ഇവിടെ എടുത്ത് പറയേണ്ടത് ഇമ്രാൻ ഖാനും അസിം മുനീറും തമ്മിലുള്ള സംഘർഷം വളരെക്കാലമായി തുടരുന്നുണ്ടെന്നതാണ്. മുനീർ തന്റെ സർക്കാരിനെതിരെ ഗൂഢാലോചന നടത്തിയെന്നും തന്നെ ജയിലിലേക്ക് അയയ്‌ക്കുന്നതിൽ വലിയ പങ്കുവഹിച്ചുവെന്നും ഇമ്രാൻ ഖാൻ വ്യക്തമായി പറഞ്ഞിട്ടുണ്ട്. ബുഷ്‌റ ബീബിയുടെ അറസ്റ്റും മുനീറിന്റെ ഗൂഢാലോചനയാണെന്ന് ഖാൻ പറഞ്ഞിരുന്നു.

ഇമ്രാൻ ഖാൻ ജയിൽ മോചിതനാകുമെന്ന അഭ്യൂഹങ്ങൾ നിലനിൽക്കുന്ന ഇത്തരമൊരു സാഹചര്യത്തിൽ പാകിസ്ഥാൻ സൈന്യം ഇത് അനുവദിക്കുമോ എന്നതാണ് വലിയ ചോദ്യം. കാരണം പാകിസ്ഥാൻ സൈന്യം രാജ്യത്തിന്റെ രാഷ്‌ട്രീയത്തിൽ ഇടപെടുന്നുണ്ട്. ഇത് പലതവണ കണ്ടിട്ടുണ്ട്. അത്തരമൊരു സാഹചര്യത്തിൽ, ഇമ്രാന്റെ പ്രശ്‌നങ്ങൾ കുറയാൻ സാധ്യതയില്ലെന്ന് വേണം കരുതാൻ.

കൂടാതെ ഇമ്രാൻ ഖാൻ ജയിൽ മോചിതനാകണമെന്ന് പാകിസ്ഥാൻ സൈന്യം ഒരിക്കലും ആഗ്രഹിക്കുന്നില്ല. ഇന്ത്യയുടെ മുന്നിൽ പാകിസ്ഥാൻ പരാജയമാണെന്ന് തെളിഞ്ഞെങ്കിലും അസിം മുനീറിന് പിന്തുണക്കാർ കൂടിയിട്ടുണ്ട്. ഇത്തരമൊരു സാഹചര്യത്തിൽ ഇമ്രാനോടുള്ള മുനീറിന്റെ മനോഭാവം എന്തായിരിക്കുമെന്നാണ് ജനം ഉറ്റുനോക്കുന്നത്.