കൊച്ചി : മാസപ്പടി കേസില് സിബിഐ അന്വേഷണം ആവശ്യമില്ലെന്ന് മുഖ്യമന്ത്രി പിണറായി വിജയന്റെ സത്യവാംഗ്മൂലം. സിബിഐ അന്വേഷണം ആവശ്യപ്പെട്ട് മാധ്യമപ്രവര്ത്തകന് എംആര് അജയന് ഹൈക്കോടതിയില് നല്കിയ ഹര്ജിയിലാണ് മുഖ്യമന്ത്രിയുടെ സത്യവാംഗ് മൂലം.ഹര്ജിയില് പൊതുപര്യമില്ലെന്ന് പറയുന്ന മുഖ്യമന്ത്രി രാഷ്ട്രീയ ആക്രമണമാണ് ലക്ഷ്യം വയ്ക്കുന്നതെന്നും കുറ്റപ്പെടുത്തി.
മാസപ്പടി കേസില് സിബിഐ അന്വേഷണം വേണമെന്ന പൊതുതാല്പര്യ ഹര്ജിയില് മുഖ്യമന്ത്രിക്കും മകള് വീണയ്ക്കും ഹൈക്കോടതി കഴിഞ്ഞദിവസം നോട്ടീസ് നല്കിയിരുന്നു. ഇതിനു മറുപടിയായാണ് മുഖ്യമന്ത്രി പിണറായി വിജയന് സത്യവാംഗ് മൂലം നല്കിയത്.തനിക്കെതിരായ ആരോപണങ്ങള് തെറ്റാണെന്നും അഴിമതി അന്വേഷിക്കുന്ന ഏജന്സികളെ ഹര്ജിക്കാരന് സമീപിച്ചില്ലെന്നും മുഖ്യമന്ത്രി പറയുന്നു. പകരം ഹൈക്കോടതിയിലാണ് എത്തിയത്.
ഹര്ജിയില് സര്ക്കാരിനെ ഇതുവരെ കക്ഷിചേര്ത്തിട്ടില്ല. ഹര്ജി അടുത്ത ദിവസം കോടതി പരിഗണിക്കും. നേരത്തെ മാസപ്പടിക്കേസില് വിജിലന്സ് അന്വേഷണം ആവശ്യപ്പെട്ട് നല്കിയ ഹര്ജി ഹൈക്കോടതി തള്ളിയിരുന്നു.
