കോട്ടയം: പാലാ തൊടുപുഴ റോഡില് കുറിഞ്ഞിക്ക് സമീപം നിയന്ത്രണം വിട്ട കാര് ഓടയിലേക്ക് വീണ് മെഡിക്കല് റെപ്രസെന്റേറ്റീവായ യുവതി മരിച്ചു. ആര്പ്പുക്കര കരിപ്പൂത്തട്ട് കൊട്ടാരത്തില് ജോസ്ന (37) ആണ് മരിച്ചത് .ആര്പ്പുക്കര കുന്നുകാലയില് നീതു സനീഷ് (36), കാറോടിച്ചിരുന്ന അയ്മനും ചിദംബരത്തില് രഞ്ജിത്ത് (35) , കാണക്കാരി മാലിപ്പറമ്പ് ജോജോ (32) എന്നിവര്ക്ക് പരിക്കേറ്റു. ഇവരെ തൊടുപുഴയിലെ ആശുപത്രിയില് പ്രവേശിപ്പിച്ചു. നീതുവിന്റെ നില ഗുരുതരമാണ് . തൊടുപുഴ ഭാഗത്തുള്ള ആശുപത്രികളില് പോയി മടങ്ങുകയായിരുന്നു മെഡിക്കല് റെപ്രസെന്റേറ്റീവുമാരായ നാലുപേരും. ജോജോയുടേതാണ് കാര്.
തൊടുപുഴയില് നിന്ന് പാലാ ഭാഗത്തേക്ക് പോവുന്നതിനിടെ ചൂരപ്പട്ട വളവിനും കുഴിവേലി വളവിനും ഇടയില് വച്ച് കാര് നിയന്ത്രണം വിട്ട് റോഡരികിലെ ഓടയിലേക്ക് വീഴുകയായിരുന്നു. മറ്റുള്ളവരെ രക്ഷിക്കാന് കഴിഞ്ഞെങ്കിലും ജെസിബി ഉപയോഗിച്ച് കാര് പുറത്തെടുത്ത ശേഷമാണ് കുടുങ്ങിക്കിടന്ന ജോസ്നയെ പുറത്തെടുക്കാനായത്.
