കോഴിക്കോട്: ഒമ്പതാം ക്ലാസുകാരനെ പത്താം ക്ലാസ് വിദ്യാര്‍ത്ഥികള്‍ ക്രൂരമായി മര്‍ദ്ദിച്ചു. താമരശേരി പുതുപ്പാടി ഗവ.ഹൈസ്‌കൂളിലെ ഒമ്പതാം ക്ലാസുകാരനെയാണ് മര്‍ദ്ദിച്ചത്.
മാസങ്ങള്‍ക്ക് മുമ്പ് സ്‌കൂളിന് പുറത്തു വച്ചുണ്ടായ പ്രശ്‌നമാണ് മര്‍ദനത്തിന് കാരണമെന്നാണ് വിവരം. കുട്ടിയുടെ തലയ്‌ക്കും കണ്ണിനും പരിക്കേറ്റു. പതിനഞ്ചോളം പേര്‍ ചേര്‍ന്നാണ് തന്നെ മര്‍ദ്ദിച്ചതെന്ന് വിദ്യാര്‍ത്ഥി പറഞ്ഞു.
കഴിഞ്ഞ ദിവസം ഉച്ചയ്‌ക്കായിരുന്നു സംഭവം. സ്‌കൂള്‍ അധികൃതര്‍ വിവരം അറിയിച്ച പ്രകാരം രക്ഷിതാക്കള്‍ സ്‌കൂളിലെത്തി.കുട്ടിക്ക് സാരമായ പരിക്കേറ്റിട്ടും സ്‌കൃള്‍ അധികൃതര്‍ ആശുപത്രിയില്‍ എത്തിച്ച് ചികിത്സ നല്‍കിയില്ലെന്ന് പറഞ്ഞ രക്ഷിതാക്കള്‍ സംഭവം ഒതുക്കാനാണ് ശ്രമിച്ചതെന്നും ആരോപിച്ചു. സംഭവത്തില്‍ താമരശേരി പൊലീസ് ജുവനൈല്‍ ജസ്റ്റിസ് ബോര്‍ഡിന് റിപ്പോര്‍ട്ട് നല്‍കി.തുടര്‍നടപടി അടുത്ത ദിവസങ്ങളിലുണ്ടാകും.
എന്നാല്‍ സംഭവം ഒതുക്കാന്‍ ശ്രമിച്ചെന്ന രക്ഷിതാക്കളുടെ ആരോപണം സ്‌കൂള്‍ അധികൃതര്‍ നിഷേധിച്ചു. നിയമ നടപടിക്കൊപ്പം നില്‍ക്കും എന്നാണ് രക്ഷിതാക്കളോട് പറഞ്ഞതെന്ന് ഹെഡ് മാസ്റ്റര്‍ പ്രതികരിച്ചു. സംഭവത്തില്‍ നാല് വിദ്യാര്‍ത്ഥികളെ 14 ദിവസത്തേക്ക് സസ്പെന്ഡ് ചെയ്തു.
പ്രതികരിക്കാൻ ഇവിടെ എഴുതുക: