കോട്ടയം: നിലമ്പൂര്‍ ഉപതെരഞ്ഞടുപ്പില്‍ മോഹന്‍ ജോര്‍ജിന് പിന്തുണയ്‌ക്കുമെന്ന് ബിഡിജെഎസ്. പ്രചാരാണര്‍ത്ഥം സംസ്ഥാന അദ്ധ്യക്ഷന്റെ നേതൃത്യത്തില്‍ കുടുംബയോഗങ്ങളും കണ്‍വെന്‍ഷനുകളും ഉള്‍പ്പെടെ സംഘടിപ്പിക്കും. പ്രചാരണ പ്രവര്‍ത്തനങ്ങള്‍ക്കായ് മുഴുവന്‍ സംസ്ഥാന കൗണ്‍സില്‍ അംഗങ്ങളേയും പങ്കെടുപ്പിയ്‌ക്കാന്‍ കോട്ടയത്ത് നടന്ന സംസ്ഥാന കൗണ്‍സില്‍ തിരുമാനിച്ചു.
ബിഡിജെഎസ് സംസ്ഥാന കമ്മറ്റിയുടെ ആഭിമുഖ്യത്തില്‍ നെല്‍ കര്‍ഷകര്‍ക്ക് ഐക്യദാര്‍ഡ്യവുമായ് ഏഴിന് പ്രതിഷേധ ധര്‍ണ്ണ സംഘടിപ്പിയ്‌ക്കും. നെല്ലിന്റെ താങ്ങുവില വര്‍ദ്ധിപ്പിച്ച കേന്ദ്രസര്‍ക്കാരിനോട് നന്ദിയുണ്ടെന്ന് സംസ്ഥാന അധ്യക്ഷന്‍ തുഷാര്‍ വെള്ളാപ്പള്ളി പറഞ്ഞു. കര്‍ഷകര്‍ക്ക് ആനുകുല്യങ്ങള്‍ നല്‍ക്കാത്ത കൃഷിവകുപ്പിനെതിരെ പ്രത്യക്ഷസമരം സംഘടിപ്പിക്കും.
നെല്ലിന്റെ താങ്ങുവിലയില്‍ കേന്ദ്രസര്‍ക്കാര്‍ റിക്കാര്‍ഡ് വര്‍ദ്ധന പ്രഖ്യാപിച്ചതും കിസാന്‍ ക്രെഡിറ്റ് കാര്‍ഡ് വഴി 4 ശതമാനം പലിശയില്‍ കര്‍ഷകര്‍ക്ക് വായ്പാ പദ്ധതി നടപ്പാക്കിയതും ബിഡിജെഎസ് സംസ്ഥാനകമ്മിറ്റി സ്വാഗതം ചെയ്തു. കേന്ദ്ര സര്‍ക്കാര്‍ പദ്ധതികളും സംസ്ഥാന സര്‍ക്കാര്‍ വിഹിതവും കേരളത്തിലെ കര്‍ഷകര്‍ക്ക് അടിയന്തിരമായി നല്‍കണമെന്ന് സംസ്ഥാന കൗണ്‍സില്‍ സര്‍ക്കാരിനോട് ആവശ്യപ്പെട്ടു. ആലപ്പുഴ, കോട്ടയം, പത്തനംതിട്ട പാലക്കാട് ജില്ലകളിലെ നെല്‍ കര്‍ഷകര്‍ അനുഭവിച്ചുകൊണ്ടിരിക്കുന്ന ദുരിതങ്ങളും നെല്ല് സംഭരണത്തില്‍ ഉണ്ടായിരിക്കുന്ന അനിശ്ചിതത്വം, നെല്‍ കാര്‍ഷിക മേഖലയില്‍ വലിയ പ്രതിസന്ധിയാണ് സൃഷ്ടിച്ചിരിക്കുന്നത്.
സംസ്ഥാന കൗണ്‍സില്‍ യോഗം സംസ്ഥാന അധ്യക്ഷന്‍ തുഷാര്‍ വെള്ളാപ്പള്ളി ഉദ്ഘാടനം ചെയ്തു. സംസ്ഥാന വൈസ് പ്രസിഡന്റ് കെ. പത്മകുമാര്‍ അധ്യക്ഷനായി. ബിഡിജെഎസിന്റെ ആഭിമുഖ്യത്തില്‍ അഭിഭാഷകരുടെ ക്ഷേമ പ്രവര്‍ത്തനങ്ങള്‍ ഏകോപിപ്പിക്കുന്നതിന് ബിഡിജെഎസ് ലീഗല്‍ സെല്‍ രൂപീകരിച്ചു.
ചെയര്‍മാനായി സിനില്‍ മുണ്ടപ്പള്ളിയെയും കണ്‍വീനറായി പി.എസ്. ജ്യോതിസ്സിനേയും തെരെഞ്ഞെടുത്തു. സംസ്ഥാന കൗണ്‍സില്‍ യോഗത്തില്‍ എ.ജി. തങ്കപ്പന്‍, പൈലി വാത്തിയാട്ട്, അഡ്വ. സിനില്‍ മുണ്ടപ്പിള്ളി, അഡ്വ. സംഗീത വിശ്വനാഥന്‍, ഉണ്ണികൃഷ്ണന്‍ കെ.എ., രാജേഷ് നെടുമങ്ങാട്, അഡ്വ.പി.എസ്. ജ്യോതിസ്, എ.ബി. ജയപ്രകാശ്, പച്ചയില്‍ സന്ദീപ്, എ.എന്‍. അനുരാഗ് സോമശേഖരന്‍ നായര്‍, പ്രേംരാജ്, അനീഷ് പുല്ലുവേലി, തമ്പി മേട്ടുത്തറ, രാകേഷ് പി.ആര്‍. എന്നിവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: