നമ്മുടെ ദൗത്യത്തിൽ ശ്രദ്ധ കേന്ദ്രീകരിക്കേണ്ട സമയാണിത് ; കോൺഗ്രസ് നേതാക്കൾ നടത്തുന്ന വിമർശനങ്ങളെ ഇപ്പോൾ ശ്രദ്ധിക്കേണ്ട കാര്യമില്ലെന്ന് ശശി തരൂർ

ന്യൂദൽഹി : ഇന്ത്യയിൽ നടക്കുന്ന ഭീകരാക്രമണങ്ങൾക്ക് പിന്നിൽ പാകിസ്ഥാനാണെന്ന് തുറന്നുകാട്ടുന്നതിനായി ഇന്ത്യൻ സർവകക്ഷി സംഘം വിദേശ പര്യടനത്തിലാണ്. ഏഴ് പ്രതിനിധികളിൽ ഒന്നിനെ നയിക്കുന്നത് മുതിർന്ന കോൺഗ്രസ് നേതാവും എംപിയുമായ ശശി തരൂരാണ്. ബ്രസീലിലെത്തിയ ശശി തരൂരിനോട് കോൺഗ്രസ് നേതാക്കൾ തനിക്കെതിരെ നടത്തുന്ന വിമർശനങ്ങളെക്കുറിച്ച് ചോദിച്ചപ്പോൾ, നമ്മുടെ ദൗത്യത്തിൽ ശ്രദ്ധ കേന്ദ്രീകരിക്കേണ്ട സമയാണിതെന്നാണ് അദ്ദേഹത്തിന്റെ പ്രതികരണം .

‘ സമ്പന്നമായ ഒരു ജനാധിപത്യത്തിൽ നിസ്സംശയമായും അഭിപ്രായങ്ങളും വിമർശനങ്ങളും ഉണ്ടാകും. പക്ഷേ ഇപ്പോൾ നമുക്ക് അക്കാര്യങ്ങളിൽ ശ്രദ്ധ കേന്ദ്രീകരിക്കാൻ കഴിയില്ലെന്ന് ഞാൻ കരുതുന്നു.ഇന്ത്യയിലേക്ക് മടങ്ങിയെത്തുമ്പോൾ, നമ്മുടെ സഹപ്രവർത്തകരുമായും വിമർശകരുമായും മാധ്യമ പ്രവർത്തകരുമായും സംസാരിക്കാൻ തീർച്ചയായും അവസരം ലഭിക്കും. എന്നാൽ ഇപ്പോൾ ഞങ്ങൾ പോകുന്ന രാജ്യങ്ങളിലാണ് ശ്രദ്ധ കേന്ദ്രീകരിക്കുന്നത്, അവിടത്തെ ജനങ്ങളിലേക്ക് ഞങ്ങളുടെ സന്ദേശം എത്തിക്കുകയാണ്. ‘ അദ്ദേഹം പറഞ്ഞു.