കൊച്ചി: ഡിജിറ്റല്‍ സര്‍വകലാശാല താത്കാലിക വൈസ് ചാന്‍സലര്‍ ഡോ. സിസ തോമസിന് പെന്‍ഷന്‍ ആനുകൂല്യങ്ങള്‍ നിഷേധിച്ച സംസ്ഥാന സര്‍ക്കാരിന് തിരിച്ചടി.പെന്‍ഷന്‍ അടക്കം വിരമിക്കല്‍ ആനുകൂല്യങ്ങള്‍ രണ്ടാഴ്ചയ്ക്കകം നല്‍കാന്‍ ഹൈക്കോടതി ഉത്തരവ്.
വിരമിച്ച് രണ്ടുവര്‍ഷമായിട്ടും ആനുകൂല്യങ്ങള്‍ നല്കിയില്ലെന്ന് കാട്ടി സിസ തോമസ് നല്കിയ ഹര്‍ജിയിലാണ് കോടതി ഉത്തരവ്. അച്ചടക്ക ലംഘനത്തിലെ അന്വേഷണം എന്ന പേരില്‍ പെന്‍ഷന്‍ ആനുകൂല്യങ്ങള്‍ തടയുന്നത് ശരിയല്ലെന്ന് കോടതി ചൂണ്ടിക്കാട്ടി. പെന്‍ഷന്‍ തുകയുടെ പലിശ സംബന്ധിച്ച് അഡ്മിനിസ്ട്രേറ്റീവ് ട്രൈബ്യൂണലിന് തീരുമാനിക്കാം. ജസ്റ്റിസുമാരായ മുഹമ്മദ് മുഷ്താഖ്, ജോണ്‍സണ്‍ ജോണ്‍ എന്നിവര്‍ ഉള്‍പ്പെട്ട ബെഞ്ചിന്റേതാണ് വിധി.
സിസ തോമസ് വിരമിച്ച് രണ്ട് വര്‍ഷം കഴിഞ്ഞിട്ടും ആനുകൂല്യങ്ങള്‍ തടഞ്ഞുവെച്ച സര്‍ക്കാര്‍ നടപടിയെ കഴിഞ്ഞ ദിവസം ഹൈക്കോടതി രൂക്ഷമായി വിമര്‍ശിച്ചിരുന്നു. ജീവനക്കാരുടെ ബാധ്യതകള്‍ ഉള്‍പ്പടെയുള്ളവയില്‍ അവര്‍ വിരമിക്കും മുന്‍പ് സര്‍ക്കാര്‍ തീരുമാനമെടുക്കണമെന്നായിരുന്നു നേരത്തേ കേസ് പരിഗണിച്ചപ്പോള്‍ ഹൈക്കോടതി പറഞ്ഞത്. നേരത്തേ അഡ്മിനിസ്ട്രേറ്റീവ് ട്രൈബ്യൂണലും സിസാ തോമസിന് ആനുകൂല്യം നല്‍കാന്‍ ഉത്തരവിട്ടിരുന്നു.
പ്രതികരിക്കാൻ ഇവിടെ എഴുതുക: