ന്യൂദല്‍ഹി: തന്റെ പേരും ചിത്രവും ഓണ്‍ലൈനില്‍ ദുരുപയോഗം ചെയ്യുന്നുണ്ടെന്നും ഇതില്‍ നിന്നും തനിക്ക് സംരക്ഷണം നല്‍കണമെന്നും ആവശ്യപ്പെട്ട് സദ്ഗുരു ജഗ്ഗി വാസുദേവ് കോടതിയില്‍. ദല്‍ഹി കോടതിയില്‍ ആണ് അദ്ദേഹം പരാതി നല്‍കിയത്. എഐ സാധ്യത പ്രയോജനപ്പെടുത്തിയാണ് പലരും തന്റെ ചിത്രങ്ങള്‍ ദുരുപയോഗം ചെയ്യുന്നതെന്നും പരാതിയില്‍ പറയുന്നു.
വിവിധ വെബ്സൈറ്റുകള്‍ തന്റെ പേരും ചിത്രവും എഐ സാധ്യത ഉപയോഗിച്ച് ദുരുപയോഗം ചെയ്യുന്നുണ്ട്. അനുമതിയില്ലാതെ ഇത് ഉപയോഗിക്കുകയും ചെയ്യുന്നു. ഇത് തടയണം. കാരണം ഇത് തന്റെ പ്രതിച്ഛായയ്‌ക്ക് മങ്ങലേല്‍പിക്കുന്നു. – സദ്ഗുരു ജഗ്ഗി വാസുദേവ് പരാതിയില്‍ പറയുന്നു.
ചില ഉല്‍പന്നങ്ങള്‍ വിറ്റഴിക്കാന്‍ വേണ്ടി വരെ ചിലര്‍ എഐ ഉപയോഗിച്ച് നിര്‍മ്മിച്ച ചിത്രം ഉപയോഗിക്കുന്നുണ്ട്. ഇതിന് ഉദാഹരണമാണ് ഗര്‍ഭധാരണത്തെക്കുറിച്ചുള്ള ഗര്‍ഭ് യാത്ര എന്ന പുസ്തകം. ഇതിന്റെ കവറില്‍ എന്റെ ചിത്രം ഉപയോഗിച്ചിട്ടുണ്ട്. എന്റെ ചിത്രമുള്ളതിനാല്‍ പലരും കണ്ണടച്ച് വിശ്വസിച്ച് ഇത്തരം ഉല്‍പന്നങ്ങള്‍ വാങ്ങുന്നുണ്ട്.- സദ് ഗുരു ജഗ്ഗി വാസുദേവ് പറയുന്നു.
സദ്ഗുരുവിന്റെ പ്രശസ്തി ദുരുപയോഗം ചെയ്ത് പലരും വെബ്സൈറ്റുകളില്‍ ഉല്‍പന്നങ്ങള്‍ വിറ്റഴിക്കുന്നുണ്ട്. ഇത്ത്രം ഉല്‍പന്നങ്ങള്‍ ഓണ്‍ലൈനില്‍ നിന്നും എടുത്തുമാറ്റണം. – ഹര്‍ജിയില്‍ അപേക്ഷിക്കുന്നു. ജഡ്ജി സൗരഭ് വാസുദേവാണ് കേസില്‍ വാദം കേള്‍ക്കുന്നത്. പരാതിക്കാരന്‍ കൃത്യമായ ലിങ്ക് നല്‍കി ഉത്തരവാദപ്പെട്ടവര്‍ക്ക് നല്‍കിയാല്‍ ഇത്തരം ഉല്‍പന്നങ്ങള്‍ നീക്കം ചെയ്യാമെന്ന് ഗൂഗിള്‍ കോടതിയെ അറിയിച്ചു.
ഇത് സംബന്ധിച്ച് ഒരു ഇടക്കാല ഉത്തരവ് ഉടനെ പുറപ്പെടുവിക്കാമെന്ന് കോടതി അറിയിച്ചു.
