ഇടുക്കി: മലങ്കര ഡാമിന്റെ 4,5 ഷട്ടറുകള്കൂടി 50 സെന്റീമീറ്റര് ഉയര്ത്തിയ സാഹചര്യത്തില് മൂവാറ്റുപുഴ ആറ്റില് ജലനിരപ്പ് ഉയരുവാന് സാധ്യതയുണ്ടെന്ന് അധികൃതര് അറിയിച്ചു. നദിയുടെ തീരത്ത് താമസിക്കുന്നവര് ജാഗ്രത പുലര്ത്തണമെന്ന് നിര്ദേശിച്ചിട്ടുണ്ട്. ഇടുക്കി, മുല്ലപ്പെരിയാര് അണക്കെട്ടുകളില് ജലനിരപ്പ് ആശങ്കപ്പെടേണ്ട സാഹചര്യത്തിലല്ല. 2333.62 അടിയാണ് ഇടുക്കി ഡാമിലെ ജലനിരപ്പ്. മുല്ലപ്പെരിയാറില് 118.1 അടിയാണ് ജലനിരപ്പ്.
ശക്തമായ കാറ്റും മഴയും തുടരുന്ന സാഹചര്യത്തില് കൊച്ചി ധനുഷ്കോടി ദേശീയപാതയിലെ മൂന്നാര് ഗ്യാപ്പ് റോഡില് രാത്രികാല ഗതാഗതം മെയ് 30 വരെ നിരോധിച്ച് ജില്ലാ കളക്ടര് ഉത്തരവിട്ടു.
ജില്ലയില് കനത്ത മഴയില് ആകെ 25 വീടുകള് തകര്ന്നു. ഉടുമ്പന്ചോല താലൂക്കില് പന്ത്രണ്ട് വീടുകള് ഭാഗികമായും ഒരു വീട് പൂര്ണ്ണമായും തകര്ന്നു. ദേവികുളം താലൂക്കില് അഞ്ച് വീടുകളും തൊടുപുഴ താലൂക്കില് ആറെണ്ണവും ഇടുക്കി താലൂക്കില് ഒരു വീടും ഭാഗികമായി തകര്ന്നു. ഒരാള്ക്ക് ജീവഹാനി സംഭവിച്ചു.
