തിരുവനന്തപുരം: കനത്ത മഴയുടെ പശ്ചാത്തലത്തില് ചുവപ്പ് ജാഗ്രത പ്രഖ്യാപിക്കുകയും വിവിധ ജില്ലകളില് മഴ ശക്തമാവുകയും ചെയ്തതോടെ തിങ്കളാഴ്ച 10 ജില്ലകളിലെ വിദ്യാഭ്യാസ സ്ഥാപനങ്ങള്ക്ക് അവധി നല്കി. പത്തനംതിട്ട, കോട്ടയം, ഇടുക്കി, എറണാകുളം, തൃശൂര്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളിലെ വിദ്യാഭ്യാസ സ്ഥാപനങ്ങള്ക്കാണ് അവധി. സ്കൂളുകളില് സ്പെഷ്യല് ക്ലാസുകള് വയ്ക്കരുതെന്നും കളക്ടര്മാരുടെ ഉത്തരവില് പറയുന്നു.
മലപ്പുറം ജില്ലയില് മദ്രസകള്, ട്യൂഷന് സെന്ററുകള് ഉള്പ്പെടെയാണ് അവധി. കണ്ണൂര് സര്വകലാശാല തിങ്കളാഴ്ച നടത്താന് നിശ്ചയിച്ചിരുന്ന എല്ലാ പരീക്ഷകളും മാറ്റി . പുതിയ തീയതി പിന്നീട് അറിയിക്കും. തിങ്കളാഴ്ച പത്തനംതിട്ട, കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് ജില്ലകളില് ചുവപ്പ് ജാഗ്രതയാണ്. ഈ ജില്ലകളില് അതിതീവ്രമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്.
കോട്ടയം
അതിതീ വ്രമഴ സാധ്യതയെത്തുടര്ന്ന് ചുവപ്പ് ജാഗ്രതപ്രഖ്യാപിച്ചതിനാല് ജില്ലയിലെ പ്രൊഫഷണല് കോളേജുകള്, വിദ്യാഭ്യാസ സ്ഥാപനങ്ങള്, അങ്കണവാടികള്, അവധിക്കാല ക്ലാസുകള് നടത്തുന്ന വിദ്യാഭ്യാസ സ്ഥാപനങ്ങള്, മറ്റ് അവധിക്കാല കലാ-കായിക പരിശീലന കേന്ദ്രങ്ങള്/ സ്ഥാപനങ്ങള്, മതപാഠശാലകള് എന്നിവയ്ക്ക് മേയ് 26 ന് അവധി പ്രഖ്യാപിച്ച് ജില്ലാ കളക്ടര് ഉത്തരവായി.
മലപ്പുറം
ജില്ലയില് കനത്ത മഴ തുടരുന്നതിനാലും മേയ് 26ന് ചുവപ്പ് ജാഗ്രതപ്രഖ്യാപിച്ച സാഹചര്യത്തിലും മലപ്പുറം ജില്ലയിലെ മദ്റസകള്, ട്യൂഷന് സെന്ററുകള് ഉള്പ്പെടെ മുഴുവന് വിദ്യാഭ്യാസ സ്ഥാപനങ്ങള്ക്കും അവധി. പരീക്ഷകള്ക്കും റസിഡന്ഷ്യല് വിദ്യാഭ്യാസ സ്ഥാപനങ്ങള്ക്കും അവധി ബാധകമാണ്.
കോഴിക്കോട്
തിങ്കളാഴ്ച കോഴിക്കോട് ജില്ലയില് ചുവപ്പ് ജാഗ്രത പ്രഖ്യാപിച്ച സാഹചര്യത്തില് സ്കൂളുകള്ക്ക് അവധി ആയിരിക്കുമെന്ന് ജില്ലാ കളക്ടര് അറിയിച്ചു.
വയനാട്
വയനാട് ജില്ലയില് ചുവപ്പ് ജാഗ്രതപ്രഖ്യാപിക്കുകയും അതിതീവ്ര മഴ തുടരുകയും ചെയ്യുന്ന സാഹചര്യത്തില് അങ്കണവാടികള്, മദ്രസകള്, സ്പെഷല് ക്ലാസുകള്, ട്യൂഷന് സെന്ററുകള് എന്നിവയ്ക്ക് കളക്ടര് തിങ്കളാഴ്ച അവധി പ്രഖ്യാപിച്ചു
പത്തനംതിട്ട
ശക്തമായ മഴ തുടരുന്ന സാഹചര്യത്തില് പത്തനംതിട്ട ജില്ലയിലെ പ്രൊഫഷണല് കോളേജുകള് ഉള്പ്പെടെ എല്ലാ വിദ്യാഭ്യാസ സ്ഥാപനങ്ങള്ക്കും മേയ് 26 തിങ്കളാഴ്ച അവധി ആയിരിക്കുമെന്ന് ജില്ലാ കളക്ടര് അറിയിച്ചു. അങ്കണവാടികള്, ട്യൂഷന് സെന്ററുകള് തുടങ്ങിയവയ്ക്കും അവധി ബാധകമായിരിക്കും.
എറണാകുളം
ശക്തമായ മഴ മൂലം എറണാകുളം ജില്ലയില് ചുവപ്പ് ജാഗ്രത പ്രഖ്യാപിച്ച സാഹചര്യത്തില് പ്രഫഷണല് സ്ഥാപനങ്ങള് ഉള്പ്പെടെ എല്ലാ വിദ്യാഭ്യാസ സ്ഥാപനങ്ങള്ക്കും തിങ്കളാഴ്ച അവധിയായിരിക്കുമെന്ന് ജില്ലാ കളക്ടര് ട്യൂഷന് സെന്ററുകള്ക്കും അംഗന്വാടികള്ക്കും അവധി ബാധകമാണ്.
കാസര്കോട്
മഴ ശക്തമായി തുടരുന്ന സാഹചര്യത്തില് മുന്കരുതല് എന്ന നിലയില് ജില്ലയിലെ വിദ്യാഭ്യാസ സ്ഥാപനങ്ങള്, ട്യൂഷന് സെന്ററുകള്, അങ്കണവാടികള്, മദ്രസകള് തുടങ്ങിയവയ്ക്കാണ് കാസര്കോട് ജില്ലാ കളക്ടര് കെ. ഇമ്പശേഖര് അവധി പ്രഖ്യാപിച്ചത്. മുന്കൂട്ടി പ്രഖ്യാപിച്ച പരീക്ഷകളില് മാറ്റമില്ല.
കണ്ണൂര്
കണ്ണൂര് ജില്ലയില് ചുവപ്പ് ജാഗ്രതപ്രഖ്യാപിച്ചിരിക്കുന്നതിനാലും കനത്ത മഴ തുടരുന്ന സാഹചര്യത്തിലും ജില്ലയിലെ അങ്കണവാടികള്, മദ്രസകള്, ട്യൂഷന് സെന്ററുകള്, സ്പെഷ്യല് ക്ലാസുകള് എന്നിവ തിങ്കളാഴ്ച പ്രവര്ത്തിക്കരുതെന്ന് ജില്ലാ ക ളക്ടര് അറിയിച്ചു.
തൃശൂര്
തൃശൂര് ജില്ലയില് കനത്ത മഴ തുടരുന്നതിനാലും മേയ് 26 ന് ചുവപ്പ് ജാഗ്രത പ്രഖ്യാപിച്ച സാഹചര്യത്തില് മുന്കരുതല് നടപടിയുടെ ഭാഗമായി തിങ്കളാഴ്ച ജില്ലയിലെ അങ്കണവാടികള്, നഴ്സറികള്, കേന്ദ്രീയ വിദ്യാലയങ്ങള്, സി.ബി.എസ്.ഇ, ഐ.സി.എസ്.ഇ സ്കൂളുകള്, പ്രൊഫഷണല് കോളേജുകള്, ട്യൂഷന് സെന്ററുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും അവധി പ്രഖ്യാപിച്ചു. മുന്കൂട്ടി നിശ്ചയിച്ച പരീക്ഷകള്ക്കും അഭിമുഖങ്ങള്ക്കും മാറ്റം ഉണ്ടായിരിക്കില്ല.
ഇടുക്കി
ഇടുക്കി ജില്ലയില് ചുവപ്പ് ജാഗ്രത പ്രഖ്യാപിച്ചിരിക്കുന്ന സാഹചര്യത്തില് അങ്കണവാടികള്, പ്രഫഷണല് കോളേജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്ക് ജില്ലാ കളക്ടര് തിങ്കളാഴ്ച അവധി പ്രഖ്യാപിച്ചു. റസിഡന്ഷ്യല് വിദ്യാഭ്യാസ സ്ഥാപനങ്ങള്ക്ക് ബാധകമല്ല. വിദ്യാഭ്യാസ സ്ഥാപനങ്ങളില് യാതൊരു വിധത്തിലുള്ള അവധിക്കാല ക്ലാസുകളും പാടുള്ളതല്ല. മാതാപിതാക്കള് ഇരുവരും ജോലിക്കു പോകുന്ന കുട്ടികളുള്ള അങ്കണവാടികളില് അത്തരം കുട്ടികള് അവധി മൂലം വീട്ടില് ഒറ്റക്കാകുന്ന സാഹചര്യം ഒഴിവാക്കാന് അങ്കണവാടി അധ്യാപകര് പ്രത്യേകം ശ്രദ്ധിക്കേണ്ടതും, ഇതിനാവശ്യമായ നിര്ദേശങ്ങള് ഐ സി ഡി എസ് സൂപ്പര്വൈസര് അങ്കണവാടി അധ്യാപകര്ക്ക് നല്കേണ്ടതുമാണ്. മുന്കൂട്ടി നിശ്ചയിച്ച പരീക്ഷകള്ക്കും, ഇന്റര്വ്യൂകള്ക്കും മാറ്റമില്ല.
