കൂത്തുപറമ്പ്: മസ്‌കത്ത് ബൗഷറിലെ റസ്റ്ററന്റില്‍ ഗ്യാസ് സിലിണ്ടര്‍ പൊട്ടിത്തെറിച്ചുണ്ടായ അപകടത്തില്‍ മലയാളി ദമ്പതികള്‍ക്ക് ദാരുണാന്ത്യം.
റസ്റ്റോറന്റിന് മുകളിലത്തെ കെട്ടിടത്തില്‍ താമസിച്ചിരുന്ന കതിരൂര്‍ ആറാം മൈല്‍ ജാന്‍ കോംപ്ലക്‌സ് ഉടമ മാങ്ങാട്ടിടം കിരാച്ചി സ്വദേശി പത്മാലയത്തില്‍ വി. പങ്കജാക്ഷന്‍ (59), ഭാര്യ കതിരൂര്‍ ആറാംമൈല്‍ കുഞ്ഞിപ്പറമ്പത്ത് കെ. സജിത (53) എന്നിവരാണ് മരിച്ചത്. ഇന്നലെ പുലര്‍ച്ചെയായിരുന്നു അപകടം. സ്‌ഫോടനത്തെ തുടര്‍ന്ന് വാണിജ്യ റെസിഡന്‍ഷ്യല്‍ കെട്ടിടം ഭാഗികമായി തകര്‍ന്നുവീണു. പാചക വാതക ചോര്‍ച്ചയെത്തുടര്‍ന്നുണ്ടായ സ്‌ഫോടനമാണ് അപകടത്തിന് കാരണമെന്ന് പ്രാഥമിക തെളിവുകള്‍ സൂചിപ്പിക്കുന്നതായി സിവില്‍ ഡിഫന്‍സ് ആന്‍ഡ് ആംബുലന്‍സ് അതോറിറ്റി വിശദമാക്കി.
മസ്‌കത്ത് ഗവര്‍ണറേറ്റിലെ സിവില്‍ ഡിഫന്‍സ് ആന്‍ഡ് ആംബുലന്‍സ് അതോറിറ്റിയിലെ അംഗങ്ങളെത്തി രക്ഷാപ്രവര്‍ത്തനം നടത്തി. വര്‍ഷങ്ങളായി ഒമാനിലുള്ള പങ്കജാക്ഷനും സജിതയും വിവിധ കമ്പനികളിലായി അക്കൗണ്ടന്റായി ജോലി ചെയ്തുവരികയായിരുന്നു. മൃതദേഹം നാട്ടിലേക്ക് കൊണ്ടുവരാനുള്ള ഒരുക്കങ്ങള്‍ ചെയ്തുവരുന്നു. ഏകമകള്‍ ഭവിഷ (എന്‍ജിനീയറിങ് വിദ്യാര്‍ത്ഥി, ചെന്നൈ).
പ്രതികരിക്കാൻ ഇവിടെ എഴുതുക: