പെഷവാർ: വടക്കുപടിഞ്ഞാറൻ പാകിസ്ഥാനിൽ ഒരു സൈനിക പോസ്റ്റ് ലക്ഷ്യമിട്ട് ആക്രമണം. ചെക്ക്പോസ്റ്റിനു നേരെയുണ്ടായ ആക്രമണത്തെത്തുടർന്ന് തീവ്രവാദികളുമായുള്ള പോരാട്ടത്തിനിടെ ഒമ്പത് സുരക്ഷാ ഉദ്യോഗസ്ഥർ കൊല്ലപ്പെടുകയും അഞ്ച് പേർക്ക് പരിക്കേൽക്കുകയും ചെയ്തു. ശനിയാഴ്ച മാധ്യമങ്ങളിൽ പ്രസിദ്ധീകരിച്ച ഒരു വാർത്തയിലാണ് ഈ വിവരം നൽകിയിരിക്കുന്നത്.
അഫ്ഗാനിസ്ഥാനുമായി അതിർത്തി പങ്കിടുന്ന ഖൈബർ പഖ്തൂൺഖ്വ പ്രവിശ്യയിലാണ് ഭീകരർ ആക്രമണം നടത്തിയതെന്ന് ഉറുദു ദിനപത്രമായ ‘മഷ്രിഖ്’ റിപ്പോർട്ട് ചെയ്തു. അതേ സമയം സൈന്യം ഔദ്യോഗിക പ്രസ്താവന നടത്തിയിട്ടില്ല. ഖൈബർ പഖ്തൂൺഖ്വ പ്രവിശ്യയിലെ ഷകായ് തെഹ്സിലിലുള്ള ദണ്ഡ ചൗക്കിയിലാണ് ആക്രമണം നടന്നത്. എന്നിരുന്നാലും ആക്രമണത്തെക്കുറിച്ച് സൈന്യത്തിന്റെ മാധ്യമ വിഭാഗത്തിൽ നിന്ന് ഔദ്യോഗിക പ്രസ്താവനകളൊന്നും വന്നിട്ടില്ല.
പരിക്കേറ്റവരെ ചികിത്സയ്ക്കായി ആശുപത്രിയിലേക്ക് കൊണ്ടുപോയതായി വാർത്തകളിൽ റിപ്പോർട്ട് ചെയ്തിട്ടുണ്ട്. പ്രധാനമായും പോലീസ് ഉദ്യോഗസ്ഥരെ ലക്ഷ്യം വച്ചതായിട്ടാണ് വിവരം. പാകിസ്ഥാനിലെ ഖൈബർ പഖ്തൂൺഖ്വ പ്രവിശ്യയിൽ ഭീകരാക്രമണങ്ങൾ സാധാരണമാണ്. അടുത്തിടെ ഇവിടെ രണ്ട് പോലീസുകാരെ അജ്ഞാതരായ തോക്കുധാരികൾ വെടിവച്ചു കൊന്നിരുന്നു.
പെഷവാറിൽ നിന്ന് ഏകദേശം 65 കിലോമീറ്റർ തെക്ക്-പടിഞ്ഞാറ് കൊഹാട്ട് ജില്ലയിലെ ടാൻഡ ഡാമിന് സമീപമാണ് സംഭവം. പോലീസുകാരെ കൊലപ്പെടുത്തിയ ശേഷം അജ്ഞാതരായ തോക്കുധാരികൾ സ്ഥലത്ത് നിന്ന് രക്ഷപ്പെട്ടു.
