ന്യൂദൽഹി : പഹൽഗാം ഭീകരാക്രമണത്തിന്റെ പശ്ചാത്തലത്തിൽ തീവ്രവാദികൾ യുദ്ധത്തിൽ വിജയിച്ചുവെന്ന് കരുതരുതെന്ന് കേന്ദ്ര ആഭ്യന്തരമന്ത്രി അമിത് ഷാ വ്യാഴാഴ്ച തീവ്രവാദികൾക്ക് മുന്നറിയിപ്പ് നൽകി. ഈ പോരാട്ടം ഇതുവരെ അവസാനിച്ചിട്ടില്ല, നമ്മൾ ഒന്നൊന്നായി പ്രതികാരം ചെയ്യും..ന്യൂദൽഹിയിലെ കൈലാഷ് കോളനിയിൽ നടന്ന ഒരു പരിപാടിയിൽ ബോഡോ നേതാവ് ബോഡോഫ ഉപേന്ദ്രനാഥ് ബ്രഹ്മയുടെ സ്മരണയ്‌ക്കായി ഒരു റോഡും പ്രതിമയും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ദൽഹിയിൽ സ്ഥാപിച്ച ഈ പ്രതിമ ബോഡോലാൻഡിനും അസമിനും മാത്രമല്ല, സ്വാതന്ത്ര്യാനന്തരം വർഷങ്ങളോളം അഭിവൃദ്ധിക്കും വികസനത്തിനും വേണ്ടി പോരാടിയ രാജ്യത്തുടനീളമുള്ള ചെറിയ ഗോത്രങ്ങൾക്കുള്ള ആദരവാണെന്നും അദ്ദേഹം പറഞ്ഞു.
അതേ സമയം പഹൽഗാമിൽ നടന്ന ഭീകരാക്രമണങ്ങളിൽ ജീവൻ നഷ്ടപ്പെട്ടവർക്ക് ആദരാഞ്ജലികൾ അർപ്പിച്ചുകൊണ്ടും, മുഴുവൻ രാജ്യവും അവരോടൊപ്പമുണ്ടെന്ന് അവരുടെ കുടുംബങ്ങൾക്ക് ഉറപ്പ് നൽകിക്കൊണ്ടുമാണ് ഷാ തന്റെ പ്രസംഗം ആരംഭിച്ചത്. 90-കൾ മുതൽ കശ്മീരിൽ ഭീകരത നടത്തുന്നവർക്കെതിരെ പ്രധാനമന്ത്രി നരേന്ദ്ര മോദിക്ക് ഒരു വിട്ടുവീഴ്ചയുമില്ലാത്ത നയമുണ്ടെന്ന് അദ്ദേഹം പറഞ്ഞു.
“നമ്മൾ നമ്മുടെ പോരാട്ടത്തിൽ ശക്തിയോടെയാണ് പോരാടിയത്. നമ്മുടെ 26 പൗരന്മാരുടെ ജീവൻ അപഹരിച്ചുകൊണ്ട് തീവ്രവാദികൾ ഈ യുദ്ധം ജയിച്ചു എന്ന് കരുതരുത്. ഭീകരത പ്രചരിപ്പിക്കുന്ന എല്ലാവരോടും ഞാൻ പറയാൻ ആഗ്രഹിക്കുന്നത് ഇത് യുദ്ധത്തിന്റെ അവസാനമല്ല എന്നാണ്. ഇതൊരു ഘട്ടമാണ്. ഓരോ വ്യക്തിക്കും ഉചിതമായ മറുപടി നൽകും,” – ഷാ പറഞ്ഞു.
കൂടാതെ നരേന്ദ്ര മോദിയുടെ നേതൃത്വത്തിലുള്ള സർക്കാർ വടക്കുകിഴക്കൻ മേഖല, ഇടതുപക്ഷ തീവ്രവാദത്തിന്റെ മേഖല, കശ്മീരിലെ ഭീകരത എന്നിവയ്‌ക്കെതിരെ ശക്തമായി പ്രതികരിച്ചിട്ടുണ്ടെന്ന് അദ്ദേഹം പറഞ്ഞു. ഭീരുത്വപരമായ ആക്രമണം നടത്തി വലിയ വിജയം നേടിയെന്ന് ആരെങ്കിലും കരുതുന്നുണ്ടെങ്കിൽ, ഇത് മോദി സർക്കാരാണെന്നും ആരെയും വെറുതെ വിടില്ലെന്നും ഷാ പറഞ്ഞു. രാജ്യത്തിന്റെ ഓരോ ഇഞ്ചിൽ നിന്നും ഭീകരതയെ വേരോടെ പിഴുതെറിയുക എന്നതാണ് നമ്മുടെ ദൃഢനിശ്ചയമെന്നും അത് നേടിയെടുക്കുമെന്നും അദ്ദേഹം പറഞ്ഞു.
ഇതിനു പുറമെ ഈ പോരാട്ടത്തിൽ 140 കോടി ഇന്ത്യക്കാർ മാത്രമല്ല, ലോകം മുഴുവൻ ഇന്ത്യയ്‌ക്കൊപ്പം നിൽക്കുന്നു. ഭീകരത അവസാനിക്കുന്നതുവരെ ഞങ്ങളുടെ പോരാട്ടം തുടരുമെന്നും ഈ പ്രവൃത്തി ചെയ്തവർക്ക് ഉചിതമായ ശിക്ഷ നൽകുമെന്നും ഷാ പറഞ്ഞു.
