കാസര്കോട്: വനിതാ പോലീസ് കോണ്സ്റ്റബിള് ഉദ്യോഗാര്ത്ഥികളും ആശാവര്ക്കര്മാരുമുള്പ്പെടെ നിസ്സഹായരായ ഒരുകൂട്ടം ആളുകളുടെ കണ്ണീരിലാണ് എല്ഡിഎഫ് സര്ക്കാര് നാലാം വാര്ഷികം ആഘോഷിക്കുന്നതെന്നും വിവിധ സമരങ്ങളോട് തികച്ചും നിഷേധാത്മകമായ സമീപനമാണ് കമ്മ്യൂണിസ്റ്റ് ഭരണകൂടം വെച്ചുപുലര്ത്തുന്നതെന്നും ബിജെപി സംസ്ഥാന ജനറല് സെക്രട്ടറി എം.ടി. രമേശ് പറഞ്ഞു. കാസര്കോട്ട് മാധ്യമങ്ങളോട് സംസാരിക്കുകയായിരുന്നു അദ്ദേഹം.
കേരളത്തില് നടക്കുന്ന വിവിധ സമരങ്ങള്ക്കെതിരെയുള്ള എല്ഡിഎഫ് നിലപാട് അവരുടെ കമ്മ്യൂണിസ്റ്റ് സ്വഭാവം നഷ്ടമായതിന് തെളിവാണ്. റാങ്ക് ലിസ്റ്റ് കാലാവധി അവസാനിക്കുമ്പോള് ഉദ്യോഗാര്ത്ഥികളെ സമാശ്വസിപ്പിക്കുന്നതിന് പകരം സ്വകാര്യസ്ഥാപനങ്ങളില് ജോലി നോക്കാന് ആവശ്യപ്പെടുന്നത് അനുചിതവും അപമാനിക്കലുമാണ്. ആശാവര്ക്കര്മാരുടെ സമരം രണ്ട് മാസം പിന്നിടുമ്പോഴും സമാന നിലപാടാണ് എല്ഡിഎഫ് സര്ക്കാര് സ്വീകരിച്ചത്. വനിതാ സിവില് പോലീസ് കോണ്സ്റ്റബിള് റാങ്ക് ജേതാക്കളുടെ വിഷയത്തില് ഉള്പ്പെടെ ഇടപെടാന് വിസമ്മതിച്ച ഡിവൈഎഫ്ഐ പിരിച്ചുവിടാന് സമയമായെന്നും യുവജനങ്ങളുടെ പ്രശ്നങ്ങളില് ഇടപെടാന് മടിക്കുന്ന യുവജന സംഘടന നാടിന് ആവശ്യമില്ലെന്നും ഒരുപക്ഷെ ലഹരി മാഫിയക്ക് ഇത്തരമൊരു സംഘടന ആവശ്യമായി വന്നേക്കാമെന്നും രമേശ് പരിഹസിച്ചു.
ബിജെപി സംസ്ഥാന അധ്യക്ഷന്റെ കേരള യാത്രയും വിക്സിത് കേരള കണ്വന്ഷനും ഏപ്രില് 21 മുതല് മെയ് 10 വരെ കേരളത്തിലെ 30 സംഘടനാ ജില്ലകളിലും നടക്കുമെന്നും അദ്ദേഹം പറഞ്ഞു. ബിജെപി ജില്ലാ അധ്യക്ഷ എം.എല്. അശ്വിനി, വൈസ് പ്രസിഡന്റ് എം. ബല്രാജ്, ജനറല് സെക്രട്ടറി എന്. ബാബുരാജ് എന്നിവരും ഒപ്പമുണ്ടായിരുന്നു.
