ഹരിവരാസനം കേട്ട് ദർശനം നടത്താൻ സാധിച്ചത് ഭാഗ്യം ; എല്ലാ വർഷവും വരണമെന്ന് തോന്നുന്നു ; കന്നി അയ്യപ്പനായി ശബരിമലയിലെത്തി കാർത്തി

പത്തനംതിട്ട: ശബരിമലയില്‍ ദര്‍ശനം നടത്തി തമിഴ് ചലച്ചിത്ര താരങ്ങളായ രവി മോഹനും കാർത്തിയും. കഴിഞ്ഞ ദിവസം രാത്രി ഹരിവരാസനം പാടുന്ന സമയത്താണ് ഇരുവരും സന്നിധാനത്തെത്തിയത്. രവി മോഹൻ പത്ത് തവണയിലധികം ശബരിമല ദർശനം നടത്തിയിട്ടുണ്ട്. എന്നാല്‍ കന്നി അയ്യപ്പനായാണ് കാർത്തി മലകയറിയത്.

ഹരിവരാസനം കേട്ട് ദർശനം നടത്താൻ സാധിച്ചത് സൗഭാഗ്യമാണെന്നാണ് കാർത്തി മാധ്യമങ്ങളോട് പറഞ്ഞത്. എല്ലാ വർഷവും വരണമെന്ന് തോന്നുന്നു. ഒരുപാട് സന്തോഷമുണ്ട്. ഇനി മകരജ്യോതി കാണാൻ വരണമെന്നാണ് ആഗ്രഹമെന്നും കാർത്തി പറഞ്ഞു.

ചോറ്റാനിക്കര ഭഗവതി ക്ഷേത്രത്തില്‍ ദർശനം നടത്തിയ ശേഷമാണ് ഇരുവരും ശബരിമലയിൽ ദർശനത്തിന് എത്തിയത്. 2015 മുതല്‍ എല്ലാ വർഷവും ദർശനം നടത്താറുണ്ടെന്ന് രവി മോഹന്‍ പറഞ്ഞു. മകര സംക്രാന്തിക്ക് എത്തി മകരവിളക്കും ദർശിച്ചിരുന്നു. ജീവിതത്തില്‍ ഒരുപാട് മാറ്റങ്ങളുണ്ടായിട്ടുണ്ട്.

എല്ലാ വർഷവും ഇവിടെ വരണമെന്ന് ആഗ്രഹമുണ്ട്. അയ്യപ്പസ്വാമി എന്റെ ഹൃദയത്തോട് ചേർന്നിരിക്കുന്നു. എനിക്ക് സാധിക്കുന്ന കാലത്തോളം എല്ലാ വർഷവും ഉറപ്പായും ശബരിമലയില്‍ എത്തും. ഓരോ തവണ എത്തുമ്പോഴും പുതിയ അനുഭവമാണ് ഉണ്ടാകുന്നതെന്നും രവി മോഹൻ പറഞ്ഞു.