കശ്മീര്: അനധികൃതമായി കൈവശം വെച്ച കശ്മീരിന്റെ ഭാഗം ഇന്ത്യയ്ക്ക് വിട്ടുനല്കണമെന്ന് പാകിസ്ഥാനോട് കേന്ദ്ര വിദേശകാര്യമന്ത്രാലയം. കശ്മീര് പാകിസ്ഥാന്റെ കഴുത്തിലെ രക്തക്കുഴലാണെന്നുള്ള പാക് ആര്മി ചീഫ് ജനറല് അസിം മുനീറിന്റെ പ്രസ്താവനയോട് പ്രതികരിക്കുകയായിരുന്നു ഇന്ത്യന് വിദേശകാര്യമന്ത്രാലയം. ഇന്ത്യയില് നിന്നും പിടിച്ചുവെച്ച കശ്മീരിന്റെ ഭാഗം കൂടി ഇന്ത്യയ്ക്ക് വിട്ടുനല്കണമെന്നും ഇന്ത്യന് വിദേശകാര്യമന്ത്രാലയം പറഞ്ഞു. പാകിസ്ഥാന്റെ കൈവശമിരിക്കുന്ന പാക് അധീന കശ്മീര് എന്നറിയപ്പെടുന്ന കശ്മീരിന്റെ ഭാഗത്തെക്കുറിച്ചാണ് ഇന്ത്യന് വിദേശകാര്യമന്ത്രാലയം സൂചന നല്കിയത്
“കശ്മീര് എന്നത് ഇന്ത്യയുടെ കേന്ദ്രഭരണപ്രദേശമാണ്. എങ്ങിനെയാണ് ഇന്ത്യയുടെ ഭാഗമായ സ്ഥലം മറ്റൊരു രാജ്യത്തിന്റെ കഴുത്തിലെ രക്തക്കുഴലാവുക?”- വിദേശകാര്യമന്ത്രാലയം പ്രസ്താവനയില് ചോദിക്കുന്നു. പാക് ആര്മി ചീഫ് ജനറല് അസിം മുനീറാണ് കഴിഞ്ഞ ദിവസം പാകിസ്ഥാനില് നടത്തിയ പ്രസ്താവനയില് കശ്മീര് പാകിസ്ഥാന്റെ കഴുത്തിലെ രക്തക്കുഴലുപോലെ അവിഭാജ്യഘടകമാണെന്ന പ്രസ്താവന നടത്തിയത്.
അനധികൃതമായി കയ്യടക്കിയ സ്ഥലങ്ങള് പാകിസ്ഥാന് ഇന്ത്യയ്ക്ക് വിട്ടുനല്കണം എന്ന ഒരു ബന്ധം മാത്രമേ പാകിസ്ഥാന് കശ്മീരുമായുള്ളൂ. – വിദേശകാര്യമന്ത്രാലയം പറഞ്ഞു.
