ആലുവ : ട്രാഫിക്ക് മേഖലയിൽ അപകടങ്ങൾ ഒഴിവാക്കാൻ നൂതന ആശയങ്ങൾ അവതരിപ്പിച്ച വിദ്യാർത്ഥികൾക്ക് റൂറൽ ജില്ലാ പോലീസ് മേധാവി ഡോ.വൈഭവ് സക്സേനയുടെ അഭിനന്ദനം.
ചിറ്റൂർ എസ്.ബി.ഒ.എ പബ്ലിക്ക് സീനിയർ സെക്കൻഡറി സ്ക്കൂളിലെ വിദ്യാർത്ഥികളായ ഷോൺ ജോസഫ്, വൈഷ്ണവ് സുബിൻ , ജെഫിൻ ആൻ്റണി, എൻറിക്ക് റോട്രിസ്, രാഹുൽ രാജ്, അഹമ്മദ് ഫംദാൻ, മെർവിൻ മാത്യു ജോർജ്, ആൽവിൻ ജോസഫ്, അവിൻ റോട്രിഗസ് എന്നീ വിദ്യാർത്ഥികൾക്കും, പ്രിൻസിപ്പാൾ ശ്രീകല കരുണാകരൻ, ഹെഡ്മിസ്ട്രസ് ട്രീസ ബിജു എന്നിവർക്കുമാണ് ജില്ലാ പോലീസ് മേധാവിയുടെ ചേമ്പറിൽ വച്ച് അഭിനന്ദനപ്പത്രം നൽകിയത്.
പോലീസ്, ആലുവയിൽ സംഘടിപ്പിച്ച ഗതാഗത സെമിനാറിലാണ് വിദ്യാർത്ഥികൾ പ്രൊജക്ട് അവതരിപ്പിച്ചത്. വാഹനങ്ങൾ അമിത വേഗത്തിലോടിച്ചാൽ ഉദ്യോഗസ്ഥരുടെ മൊബൈലിൽ സന്ദേശം വരുന്ന സംവിധാനം, എതിർ വശത്ത് നിന്നും വരുന്ന വാഹനങ്ങളുടെ വെളിച്ചം മൂലം അപകടം തടയുന്ന സംവിധാനം, വഴിയരികിൽ സ്ഥാപിക്കുന്ന ബോക്സിനകത്തെ സിച്ച് വഴി ജി പി എസ് മോഡ്യൂൾ വഴി പോലീസ് -ഫയർഫോഴ്സ് എന്നിവരെ അറിയിക്കുന്ന സംവിധാനം, കാർഡ് വഴി ഗേറ്റ് തുറക്കുന്ന സംവിധാനം തുടങ്ങിയവയുടെ ലഘുരൂപങ്ങളാണ് അവതരിപ്പിച്ചത്.
ജില്ലാ പോലീസ് മേധാവി പ്രോജക്ട് കണ്ട് വിലയിരുത്തിയിരുന്നു. ഭാവിയുടെ പ്രതീക്ഷകളാണ് വിദ്യാർത്ഥികളെന്ന് എസ്.പി പറഞ്ഞു
