കോഴിക്കോട്: നാദാപുരത്ത് ഗതാഗതം തടസപ്പെടുത്തി പടക്കം പൊട്ടിച്ച സംഭവത്തില്‍ മൂന്ന് പേരെ അറസ്റ്റ് ചെയ്തു.കല്ലാച്ചിയില്‍ സംസ്ഥാനപാതയിലാണ് കഴിഞ്ഞ ഞായറാഴ്ച രാത്രി പടക്കം പൊട്ടിച്ചത്.
കല്ലാച്ചി സ്വദേശികളായ നടുവത്ത് വീട്ടില്‍ ഇമ്രാന്‍ഖാന്‍(28), മത്തത്ത് സജീര്‍(27), പുത്തന്‍പുരയില്‍ മുഹമ്മദ് റാഫി(27) എന്നിവരാണ് അറസ്റ്റിലായത്.
കേസ് എടുത്ത് അന്വേഷണം ആരംഭിച്ചതിനെ തുടര്‍ന്ന് ഒളിവില്‍ പോകാനുള്ള ശ്രമത്തിനിടയിലാണ് പ്രതികളെ അറസ്റ്റ് ചെയ്തത്.
ഒരുകൂട്ടം യുവാക്കള്‍ റോഡില്‍ അപകടകരമായ രീതിയില്‍ പടക്കം പൊട്ടിക്കുകയായിരുന്നു. സംഭവത്തില്‍ കണ്ടാലറിയാവുന്ന 15 പേര്‍ക്കെതിരേ പൊലീസ് കേസെടുക്കുകയായിരുന്നു. സമൂഹമാധ്യമങ്ങളിലൂടെ പ്രചരിച്ച ദൃശ്യങ്ങളില്‍ നിന്നാണ് പൊലീസ് പ്രതികളെ തിരിച്ചറിഞ്ഞത്. കേസിലെ മറ്റ് പ്രതികളെയും ഉടന്‍ പിടികൂടുമെന്ന് പൊലീസ് അറിയിച്ചു.
പ്രതികരിക്കാൻ ഇവിടെ എഴുതുക: