ഇരിങ്ങാലക്കുട: ഇരിങ്ങാലക്കുട കൂടല്മാണിക്യം ക്ഷേത്രത്തില് കഴകക്കാരനായി നിയമിതനായ ആര്യനാട് സ്വദേശി ബാലു രാജിവച്ചു. ചൊവ്വാഴ്ച ദേവസ്വം ഓഫീസിലെത്തിയാണ് അഡ്മിനിസ്ട്രേറ്റര്ക്ക് രാജി നല്കിയത്. ആരോഗ്യപരമായ കാരണങ്ങളാലും വ്യക്തിപരമായ കാരണങ്ങളാലുമാണ് രാജി എന്നാണ് കത്തിലെ ഉള്ളടക്കം.
രണ്ടാഴ്ചത്തെ മെഡിക്കല് അവധി കഴിഞ്ഞ് തിരിച്ചെത്തിയപ്പോഴാണ് രാജി സമർപ്പിച്ചത്. കഴകക്കാരന് തസ്തികയില് കൂടല്മാണിക്യത്തിലെന്നല്ല, ഒരു ക്ഷേത്രത്തിലും തുടരാന് ആഗ്രഹിക്കുന്നില്ലെന്ന് ബാലു നേരത്തേ തന്നെ വ്യക്തമാക്കിയിരുന്നു. ഇത് കുടുംബവും താനും എടുത്ത തീരുമാനമാണെന്നും തന്ത്രിമാര് ബഹിഷ്കരിച്ചത് അറിഞ്ഞിരുന്നില്ലെന്നും അദ്ദേഹം പറഞ്ഞു. മുന്പ് ജോലി ചെയ്തിരുന്ന തിരുവിതാംകൂര് ദേവസ്വം തികച്ചും വ്യത്യസ്തമായിരുന്നു. അവിടുത്തെ അവസ്ഥയല്ല ഇവിടെയുള്ളത്. ഇനി ഉത്സവങ്ങളുടെ സമയമാണ്. തന്ത്രിമാര് എല്ലാ ചടങ്ങുകളിലും ഉണ്ടാകുമല്ലോ, അവരുടെ സമീപനം എനിക്കും ബുദ്ധിമുട്ടാകും. താന് കാരണം ഒരു പ്രശ്നം വേണ്ടെന്നും ബാലു പറഞ്ഞിരുന്നു.
തന്ത്രിമാരും വാര്യര് സമാജവും എതിര്പ്പുയര്ത്തിയതോടെയാണ് കഴകക്കാരന് നിയമനം വലിയ വിവാദമായത്. ജാതി വിവേചനമാണ് തന്ത്രിമാര് നടത്തുന്നതെന്നും വിമര്ശനം ഉയര്ന്നു. എന്നാല് ആചാരപ്രകാരമുളള അവകാശം സംരക്ഷിക്കുക എന്നതു മാത്രമാണ് തങ്ങളുടെ ആവശ്യമെന്നാണ് വാര്യര് സമാജം പറയുന്നത്. ഫെബ്രുവരി 24-നാണ് ബാലു കൂടല്മാണിക്യം ക്ഷേത്രത്തില് കഴകം ജോലിയില് പ്രവേശിച്ചത്.
മാര്ച്ച് ആറിനാണ് ഇദ്ദേഹത്തെ അറ്റന്ഡര് ജോലിയിലേക്ക് മാറ്റിയിരുന്നു. താത്പര്യം അറ്റന്ഡര് ജോലിയാണെന്നു ആവശ്യപ്പെട്ട് ബാലു ദേവസ്വത്തിന് ഇ-മെയില് അയച്ചിരുന്നു. എന്നാല്, കഴകം ജോലിതന്നെ ചെയ്യണമെന്നായിരുന്നു ദേവസ്വത്തിന്റെ നിലപാട്.
