പത്തനംതിട്ട: ശബരിമല ഉത്സവത്തിനും മേട വിഷു പൂജകള്ക്കുമായി ക്ഷേത്ര നട ഇന്നു തുറക്കും. തുടര്ച്ചയായി 18 ദിവസം ദര്ശനത്തിന് അവസരമുണ്ട്. ഇന്ന് വൈകിട്ട് 4ന് തന്ത്രി കണ്ഠര് രാജീവരുടെ സാന്നിധ്യത്തില് മേല്ശാന്തി അരുണ് കുമാര് നമ്പൂതിരി നടതുറന്ന് ദീപം തെളിയിക്കും. ഇന്ന് പൂജകള് ഒന്നുമുണ്ടാകില്ല. നാളെ രാവിലെ 9.45നും 10.45 നും മധ്യേ തന്ത്രി കണ്ഠര് രാജീവരുടെ കാര്മികത്വത്തില് ഉത്സവത്തിന് കൊടിയേറും. 11നാണ് പമ്പാ നദിയില് ശബരീശന് ആറാട്ട്.
ഉത്സവം കഴിഞ്ഞ് വിഷുവിനോട് അനുബന്ധിച്ച് പൂജകള് കൂടി വരുന്നതിനാലാണ് തുടര്ച്ചയായി 18 ദിവസം ദര്ശനത്തിന് അവസരം ലഭിക്കുന്നത്. വിഷു ദിവസമായ 14ന് രാവിലെ നാലു മണി മുതല് ഏഴുമണിവരെ വിഷുക്കണി ദര്ശനം. വിഷുദിനത്തില് രാവിലെ ഏഴു മുതലാകും അഭിഷേകം. പൂജകള് പൂര്ത്തിയാക്കി 18ന് രാത്രി 10 മണിക്ക് നടയടയ്ക്കും.
