ചെന്നൈ : നവദമ്പതികള്‍ വൈകാതെ കുഞ്ഞുങ്ങള്‍ക്ക് ജന്മം നല്‍കണമെന്ന് തമിഴ്‌നാട് ഉപമുഖ്യമന്ത്രി ഉദയനിധി സ്റ്റാലിന്‍. പക്ഷേ അധികം കുട്ടികൾ വേണ്ടെന്നും അദ്ദേഹം പറഞ്ഞു. കുട്ടികള്‍ക്കു തമിഴ് പേരുകളിടണമെന്നും ഉദയനിധി ആവശ്യപ്പെട്ടു.
ചെന്നൈയില്‍ സമൂഹ വിവാഹത്തില്‍ പങ്കെടുക്കുകയായിരുന്നു അദ്ദേഹം. ആദ്യം ജനനനിയന്ത്രണം നടപ്പാക്കിയ സംസ്ഥാനം തമിഴ്‌നാടാണെന്നും അതിന്റെ പ്രശ്‌നങ്ങളാണു ഇപ്പോള്‍ നേരിടുന്നതെന്നും അദ്ദേഹം പറഞ്ഞു. കേന്ദ്രസർക്കാർ ഇപ്പോൾ ജനസംഖ്യാ കണക്കുകൾ നിരീക്ഷിച്ചുകൊണ്ടിരിക്കുകയാണെന്നും കുടുംബാസൂത്രണ നടപടികൾ ഫലപ്രദമായി നടപ്പിലാക്കിയ തമിഴ്‌നാടിനെതിരെ നടപടി സ്വീകരിക്കുന്നുണ്ടെന്നും ഉദയനിധി പറഞ്ഞു.
ജനസംഖ്യാടിസ്ഥാനത്തില്‍ മണ്ഡല പുനര്‍നിര്‍ണയം നടപ്പാക്കുമ്പോള്‍ ദക്ഷിണേന്ത്യന്‍ സംസ്ഥാനങ്ങളില്‍ ലോക്‌സഭാ സീറ്റുകള്‍ കുറയുമെന്ന ആശങ്ക നിലനില്‍ക്കുന്നതിനിടെയാണ് ഉദയനിധി സ്റ്റാലിന്റെ പരാമര്‍ശം. ഇന്ന് തമിഴ്‌നാട്ടിൽ നിന്ന് 39 എംപിമാരുണ്ട്. അതിർത്തി നിർണ്ണയം നടന്നാൽ ഇത് 31 ആയി കുറയും. തമിഴ്‌നാടിന്റെ ജനസംഖ്യ 7 കോടിയാണ്, അതേസമയം വടക്കൻ സംസ്ഥാനങ്ങൾക്ക് 100-ലധികം സീറ്റുകൾ ലഭിക്കും – അദ്ദേഹം പറഞ്ഞു.
ഒരാഴ്ച മുമ്പ് മുഖ്യമന്ത്രി എം.കെ. സ്റ്റാലിനും സമാനമായ പരാമർശം നടത്തിയിരുന്നു. നേരത്തെ, നമ്മൾ പറയുമായിരുന്നു, നിങ്ങളുടെ സമയമെടുത്ത് ഒരു കുഞ്ഞിന് ജന്മം നൽകൂ എന്ന്. എന്നാൽ ഇപ്പോൾ സ്ഥിതി മാറി, നമ്മൾ അത് ഇപ്പോൾ പറയണം – സ്റ്റാലിൻ പറഞ്ഞു. സമയം എടുക്കൂ എന്ന് ഞാൻ പറയില്ല, പക്ഷേ ഉടൻ തന്നെ നിങ്ങളുടെ കുഞ്ഞിനെ പ്രസവിക്കൂ എന്ന് അദ്ദേഹം പറഞ്ഞിരുന്നു.
പ്രതികരിക്കാൻ ഇവിടെ എഴുതുക: