കൊച്ചി: വിവാഹിതരായ പെണ്കുട്ടികളുടെ വിലാസം നല്കി കബളിപ്പിച്ച വിവാഹ ബ്യൂറോ 14,000 രൂപ ഉപഭോക്താവിന് നഷ്ടപരിഹാരം നല്കണമെന്ന് എറണാകുളം ജില്ല ഉപഭോക്തൃ തര്ക്ക പരിഹാര കമ്മീഷന് ഉത്തരവായി. ചേരാനല്ലൂര് സ്വദേശി ഗോപാലകൃഷ്ണന് സമര്പ്പിച്ച പരാതിയിലാണ് ഉത്തരവ്.
മകന് വധുവിനെ കണ്ടെത്താനാണ് മലപ്പുറം തിരൂരില് പ്രവര്ത്തിക്കുന്ന ‘ലക്ഷ്മി മാട്രിമോണി’ എന്ന സ്ഥാപനത്തെ പരാതിക്കാരന് സമീപിച്ചത്. 2000 രൂപ ഫീസായി നല്കിയ പരാതിക്കാരന് 8 പെണ്കുട്ടികളുടെ വിശദാംശങ്ങളാണ് എതിര്കക്ഷി നല്കിയത്. അതില് 7 പെണ്കുട്ടികളും നേരത്തെ വിവാഹിതരായിരുന്നു. ശേഷിച്ച ഒരു പെണ്കുട്ടിയുടെ പൂര്ണമായ വിവരം വിവാഹ ബ്യൂറോ നല്കിയില്ല.
പരാതിക്കാരനെ തെറ്റിദ്ധരിപ്പിച്ചതു മൂലം ധനനഷ്ടവും മന:ക്ലേശവും ഉണ്ടായി എന്ന് തെളിയിക്കപ്പെട്ട സാഹചര്യത്തിലാണ് ഡി.ബി ബിനു അധ്യക്ഷനും വി. രാമചന്ദ്രന്, ടിഎന് ശ്രീവിദ്യ എന്നിവരുടെ ബെഞ്ച് വിധി പറഞ്ഞത്.
പരാതിക്കാരന് വേണ്ടി അഡ്വക്കറ്റ് മിഷാല്.എം.ദാസന് ഹാജരായി.
