ലണ്ടൻ : ബംഗ്ലാദേശ് ജയിലിൽ കഴിയുന്ന ഇസ്കോൺ സന്യാസി ചിൻമോയ് കൃഷ്ണ ദാസിന്റെ മോചനം ഉറപ്പാക്കണമെന്ന് അഭ്യർത്ഥിച്ച് യുഎസ് ഡയറക്ടർ ഓഫ് നാഷണൽ ഇന്റലിജൻസ് (ഡിഎൻഐ) തുളസി ഗബ്ബാർഡിന് കത്തയച്ച് യുകെ ആസ്ഥാനമായുള്ള ഒരു സംഘടന. യുഎസ് ഡയറക്ടർ ഓഫ് നാഷണൽ ഇന്റലിജൻസ് (ഡിഎൻഐ) ആയി സത്യപ്രതിജ്ഞ ചെയ്ത് ദിവസങ്ങൾക്ക് ശേഷമാണ് ബംഗ്ലാദേശിൽ പീഡിപ്പിക്കപ്പെടുന്ന ഹിന്ദുക്കളെ രക്ഷിക്കണമെന്ന ആവശ്യവുമായി സംഘടന തുളസിയെ ബന്ധപ്പെട്ടത്.
“ചിന്മയ് കൃഷ്ണ ദാസിനെ മോചിപ്പിക്കണമെന്ന് ആവശ്യപ്പെടാനും ഹിന്ദുക്കൾക്കെതിരായ പീഡനം തടയാൻ യൂനുസ് സർക്കാരിൽ സമ്മർദ്ദം ചെലുത്താനും നിങ്ങളോട് അഭ്യർത്ഥിക്കുന്നു,” -കത്തിൽ പറയുന്നു. ഇസ്കോൺ സന്യാസിയുമായുള്ള ഗബ്ബാർഡിന്റെ മുൻകാല ബന്ധം കണക്കിലെടുത്താണ് യുകെയിലെ സെക്കുലർ ബംഗ്ലാദേശ് മൂവ്മെന്റ് തുളസിക്ക് കത്തയച്ചത്.
ബംഗ്ലാദേശിൽ കഴിഞ്ഞ വർഷം നവംബർ 25 ന് അറസ്റ്റിലായതിനെത്തുടർന്ന് സന്യാസി, ഹിന്ദുക്കൾക്കെതിരെയുള്ള പീഡനത്തിന്റെ മുഖമായി മാറിയിട്ടുണ്ട്. രാജ്യദ്രോഹക്കുറ്റം ചുമത്തി അദ്ദേഹം അന്നുമുതൽ ജയിലിൽ കഴിയുകയാണ്.
മുമ്പ് ചാറ്റോഗ്രാമിൽ ഇസ്കോൺ ഡിവിഷണൽ ഓർഗനൈസിംഗ് സെക്രട്ടറി സ്ഥാനം വഹിച്ചിരുന്ന അദ്ദേഹം യൂനുസ് ഭരണകൂടത്തിന്റെ ന്യൂനപക്ഷ പീഡനത്തിനെതിരായ പ്രതിഷേധങ്ങളുടെ കേന്ദ്രബിന്ദുവായിരുന്നു.
