കോട്ടയം: ആത്മകഥാ വിവാദത്തില് ഇ പി ജയരാജന്റെ ഗൂഢാലോചനാ വാദം തള്ളി പോലീസ്. കേസില് ഗൂഢാലോചന നടന്നിട്ടില്ലെന്നും ഡിസി ബുക്സിന്റെ അന്നത്തെ എഡിറ്റര് എ വി ശ്രീകുമാര് മാത്രമാണ് പ്രതിയെന്നുമാണ് പോലീസ് കുറ്റപത്രത്തില് പറയുന്നത്. സിപിഎം കേന്ദ്ര കമ്മിറ്റി അംഗം ഇ പി ജയരാജന്റെ ആത്മകഥയായ കട്ടന്ചായയും പരിപ്പുവടയും പുറത്തിറങ്ങുംമുന്പേ അതിലെ ചില പരാമര്ശങ്ങള് ചാനല് വാര്ത്തയായത് വലിയ വിവാദമായിരുന്നു.ഉപതെരഞ്ഞെടുപ്പിന് തലേന്ന് പുറത്തുവന്ന വിവരങ്ങള് സിപിഎമ്മിനെ വലിയതോതില് പ്രതിരോധത്തില് ആക്കി.ഇ പി ജയരാജനെതിരെ പാര്ട്ടിയില് നിന്നുതന്നെ വലിയ വിമര്ശനം ഉയര്ന്നതോടെ അദ്ദേഹം പ്രസാധകരായ ഡിസി ബുക്ക്സിനെതിരെ പോലീസില് പരാതി നല്കി. ഈ കേസിലാണ് പോലീസ് ഇപ്പോള് കുറ്റപത്രം തയ്യാറാക്കിയിരിക്കുന്നത്. ഫെബ്രുവരി രണ്ടാം വരത്തില് കുറ്റപത്രം കോടതിയില് സമര്പ്പിക്കും എന്നാണ് അറിയുന്നത്.ആത്മകഥ പ്രസിദ്ധീകരണത്തിന് ഡിസി ബുക്സുമായി കരാര് ഉണ്ടാക്കിയിട്ടില്ലെന്നായിരുന്നു ജയരാജന് വ്യക്തമാക്കിയത്. ജയരാജന് വേണ്ടി ദേശാഭിമാനി ലേഖകന് തയ്യാറാക്കിയ ആത്മകഥയുടെ ചില ഭാഗങ്ങള് ഡിസി ബുക്സിനു നല്കിയിരുന്നു.താന് പറയാത്ത ചില കാര്യങ്ങള് ആത്മകഥയിലേതെന്ന വ്യാജേന ചാനല് വാര്ത്തയാവുകയായിരുന്നുവെന്നാണ് ജയരാജന്റെ വാദം. ഇതില് ഗൂഢാലോചനയുണ്ടെന്നും അദ്ദേഹം ആരോപിച്ചിരുന്നു. ജയരാജന്റെ അനുമതിയില്ലാതെയാണ് പുസ്തകത്തിന്റെ ഭാഗങ്ങള് മാധ്യമങ്ങള്ക്ക് നല്കിയതെന്നും എന്നാല് ഇതില് ഗൂഢാലോചന നടന്നതിന് തെളിവില്ലെന്നുമാണ് പോലീസ് പറയുന്നത്.
