തിരുവനന്തപുരം: ബാലരാമപുരത്ത് രണ്ടു വയസുകാരിയുടെ മരണവുമായി ബന്ധപ്പെട്ട് ദുരൂഹത ഏറുന്നു.കുട്ടിയുടെ അമ്മ ശ്രീതുവുമായി ബന്ധമുളള ജ്യോത്സ്യന്‍ ശംഖുമുഖം ദേവീദാസനെ കസ്്റ്റഡിയിലെടുത്തുളള ചോദ്യം ചെയ്യല്‍ തുടരുകയാണ്.
കരിക്കകം സ്വദേശി ശംഖുംമുഖം ദേവീദാസന്റെ കൂടെ മന്ത്രവാദങ്ങളില്‍ സഹായിയായി ശ്രീതു പോയിരുന്നു.ഏറെ സാമ്പത്തിക ബാധ്യത ഉളള കുടുംബത്തിന് ഉപദേശം നല്‍കിയിരുന്നത് ഈ ജ്യോത്സ്യനായിരുന്നു.
അടുത്തിടെ, ശ്രീതുവും ഹരികുമാറും തല മുണ്ഡനം ചെയ്തത് ശംഖുമുഖം ദേവീദാസന്റെ നിര്‍ദേശപ്രകാരമായിരുന്നുവെന്നാണ് കരുതുന്നത്. ശ്രീതു മതപഠന ക്ലാസുകളില്‍ പങ്കെടുത്തിരുന്നുവെന്ന് പൊലീസിനു വിവരം ലഭിച്ചിട്ടുണ്ട്. ആലപ്പുഴയിലെ ഒരു പൂജാരിയുടെ സഹായി ആയിരുന്നു ഹരികുമാര്‍. മറ്റു ജോലികള്‍ക്കൊന്നും ഇയാള്‍ പോയിരുന്നില്ല.
ശംഖുമുഖം ദേവീദാസന്റെ കൂടെ ഒരാഴ്ചയോളം ഹരികുമാര്‍ ജോലി ചെയ്തിരുന്നതായും പിന്നീട് ഹരികുമാറിനെ പറഞ്ഞുവിട്ടുവെന്നാണ് ദേവീദാസന്‍ പൊലീസിനോടു പറഞ്ഞത്. ഹരികുമാറിന്റെ പിതാവിന്റെ മരണവുമായി ബന്ധപ്പെട്ട് വീട്ടില്‍ പൂജ നടത്താന്‍ ദേവീദാസന്‍ എത്തിയിരുന്നുവെന്നും റിപ്പോര്‍ട്ടുണ്ട്.
കൊല്ലപ്പെട്ട ദേവേന്ദു ജനിച്ചതിന് ശേഷമാണ് കുടുംബത്തിന് കടബാധ്യത വന്നതെന്ന് ഹരികുമാര്‍ വിശ്വസിച്ചിരുന്നതായി പൊലീസിന് സംശയമുണ്ട്. ശ്രീതുവിന്റെ 30 ലക്ഷം രൂപ ശംഖുമുഖം ദേവീദാസന്‍ തട്ടിച്ചെന്ന ആക്ഷേപവും അന്വേഷിക്കുന്നുണ്ട്.
പ്രതികരിക്കാൻ ഇവിടെ എഴുതുക: