ചെന്നൈ: തൊട്ടതിനും പിടിച്ചതിനും ബ്രാഹ്മണിക്കല് ഹെജിമണിയെ കുറ്റം പറഞ്ഞ് ദ്രാവിഡരാഷ്ട്രീയം അരക്കിട്ടുറപ്പിക്കാന് ശ്രമിക്കുന്ന മുഖ്യമന്ത്രി സ്റ്റാലിനെതിരെ ദളിത് കാര്ഡുയര്ത്തി തമിഴ്നാട് ഗവര്ണര്. തമിഴ്നാട്ടില് 20 ശതമാനം ജനസംഖ്യയുള്ള ദളിതര്ക്ക് ഒരു മുഖ്യമന്ത്രി തമിഴ്നാട്ടില് വേണമെന്ന ആവശ്യമാണ് ഗവര്ണര് ആര്.എന്.രവി ഉയര്ത്തിയിരിക്കുന്നത്.
തമിഴ്നാട്ടിലെ 32 ജില്ലകളിലെ 17 എണ്ണത്തിലും അഞ്ചിലൊന്ന് ജനസംഖ്യ ദളിതരാണ്. ഇവര്ക്ക് മുഖ്യമന്ത്രി സ്ഥാനം നല്കേണ്ട കാലം അതിക്രമിച്ചെന്നാണ് തമിഴ്നാട് ഗവര്ണര് ആര്.എന്.രവി പറയുന്നത്.
തമിഴ്നാട്ടിലെ ദളിത് സംഘടനകളുടെ നിരന്തരമായ ആവശ്യം തന്നെയാണ് ആര്.എന്. രവി ഉയര്ത്തിയിരിക്കുന്നത്. ദളിതര്ക്ക് രാഷ്ട്രീയത്തില് അര്ഹമായ സ്ഥാനം നല്കിയില്ലെന്ന പരാതി ദളിത് സംഘടനകള് എപ്പോഴും ഉയര്ത്തുന്നതാണ്.
ഡിഎംകെ എന്ന പ്രധാന ദ്രാവിഡ പാര്ട്ടിയെ നയിക്കുന്ന കരുണാനിധിയുടെ കുടുംബം വെള്ളാളര് സമുദായമാണ്. ഇവര് ദളിതര് അല്ല. മറ്റ് പിന്നാക്ക വിഭാഗമാണ്. സ്റ്റാലിനും മകനും മറ്റ് പിന്നാക്ക വിഭാഗത്തില്പ്പെട്ടവരാണ്. സ്റ്റാലിന് ശേഷം മകന് ഉദയനിധി എന്ന മക്കള് രാഷ്ട്രീയ ഫോര്മുല 2026ലെ നിയമസഭാ തെരഞ്ഞെടുപ്പില് നടപ്പാക്കാനാണ് സ്റ്റാലിന്റെ ശ്രമം. അതിനിടയിലാണ് ദളിതരുടെ ഉയിര്ത്തെഴുന്നേല്പിന് ആഹ്വാനം ചെയ്യുന്ന പ്രസ്താവന തമിഴ്നാട് ഗവര്ണര് ആര്.എന്.രവി നടത്തിയത്. പട്ടികജാതി-പട്ടികവിഭാഗങ്ങള് മുഴുവന് കാലങ്ങളായി വോട്ട് ചെയ്യുന്നത് ഡിഎംകെയ്ക്കും എഐഎഡിഎംകെയ്ക്കും ആണെങ്കിലും ഇവരുടെ വോട്ട് വാങ്ങുകയല്ലാതെ ഈ സമുദായത്തെ രാഷ്ട്രീയ-സാമൂഹിക രംഗങ്ങളില് മുന്നോട്ട് കൊണ്ടുവരാന് ദ്രാവിഡ പാര്ട്ടികള് ശ്രമിച്ചിട്ടില്ല.
