തിരുവനന്തപുരം: ബാലരാമപുരത്ത് കിണറ്റില്‍ മരിച്ച നിലയില്‍ കണ്ടെത്തിയ രണ്ടു വയസുകാരി ദേവേന്ദുവിന്റെ പോസ്റ്റുമോര്‍ട്ടം റിപ്പോര്‍ട്ട് പുറത്തുവന്നു.കുഞ്ഞിനെ ജീവനോടെ കിണറ്റിലെറിഞ്ഞതാണെന്ന് റിപ്പോര്‍ട്ടില്‍ സ്ഥിരീകരിക്കുന്നു.
മുങ്ങി മരണമെന്നാണ് പോസ്റ്റുമോര്‍ട്ടം റിപ്പോര്‍ട്ടില്‍ പറയുന്നത്. കുട്ടിയുടെ ശരീരത്തില്‍ മറ്റ് മുറിവുകളില്ല.വ്യാഴാഴ്ച രാവിലെയാണ് വീട്ടില്‍ നിന്നും കാണാതായ കുഞ്ഞിനെ മുറ്റത്തെ കിണറ്റില്‍ മരിച്ച നിലയില്‍ കണ്ടെത്തിയത്.
പോസ്റ്റുമോര്‍ട്ടത്തിന് ശേഷം ദേവേന്ദുവിന്റെ മൃതദേഹം സംസ്‌കരിച്ചു. കുടുംബ വീട്ടു വളപ്പിലാണ് മൃതദേഹം സംസ്‌കരിച്ചത്. കുട്ടിയുടെ അയല്‍വീട്ടിലാണ് മൃതദേഹം പൊതുദര്‍ശനത്തിന് വച്ചത്. കുട്ടിയുടെ അമ്മൂമ്മ ശ്രീകലയും അച്ഛന്‍ ശ്രീജിത്തും സ്‌റ്റേഷനില്‍ നിന്നും സംസ്‌കാര ചടങ്ങുകള്‍ നടന്ന വീട്ടിലേക്ക് പോയി.കുഞ്ഞിന്റെ കൊലപാതകത്തില്‍ അമ്മാവനെയും അമ്മയെയും കേന്ദ്രീകരിച്ചാണ് അന്വേഷണമെന്ന് പൊലീസ് പറഞ്ഞു.
കുഞ്ഞിനെ കിണറ്റില്‍ എറിഞ്ഞ് കൊലപ്പെടുത്തുകയായിരുന്നു എന്ന് അമ്മാവന്‍ ഹരികുമാര്‍ പൊലീസിന് മൊഴി നല്‍കി. പ്രതിയുടെ മൊഴി പൂര്‍ണമായും പൊലീസ് വിശ്വസിച്ചിട്ടില്ല. പ്രതിയെ പൊലീസ് കൂടുതല്‍ ചോദ്യം ചെയ്തുവരുന്നു.കേസില്‍ നേരത്തെ കുട്ടിയുടെ അച്ഛനെയും അമ്മയെയും അമ്മാവനെയും ഉള്‍പ്പെടെ കസ്റ്റഡിയിലെടുത്തിരുന്നു. തുടര്‍ന്ന് നടത്തിയ ചോദ്യം ചെയ്യലിലാണ് കുട്ടിയുടെ അമ്മാവന്‍ കുറ്റം സമ്മതിച്ചത്. കൊലപാതക കാരണം ഉള്‍പ്പെടെയുള്ള കാര്യങ്ങള്‍ കൂടുതല്‍ ചോദ്യം ചെയ്യലിലെ വ്യക്തമാകുകയുള്ളുവെന്ന് പൊലീസ് അറിയിച്ചു.
പ്രതികരിക്കാൻ ഇവിടെ എഴുതുക