ഭാരതത്തിന്റെ ബഹിരാകാശ സ്വപ്‌നങ്ങള്‍ക്ക് അതിനൂതനമായ സാങ്കേതികവിദ്യയുടെ സ്വര്‍ണ്ണച്ചിറകുകള്‍ നല്‍കുന്ന ഐഎസ്ആര്‍ഒ പുതിയൊരു ചരിത്രം കുറിച്ചിരിക്കുകയാണ്. നൂറാമത്തെ റോക്കറ്റ് വിക്ഷേപിച്ചുകൊണ്ട് ഈ മഹാസ്ഥാപനം രാഷ്ട്രത്തിന്റെ അന്തസ്സ് വാനോളം ഉയര്‍ത്തി. ഗതിനിര്‍ണയ സംവിധാനങ്ങള്‍ക്കുള്ള എന്‍വിഎസ് -2 ഉപഗ്രഹം വിക്ഷേപിക്കുന്നതിന് ആവശ്യമായ ജിഎസ്എല്‍വി-എഫ്. 15 റോക്കറ്റ് ചൊവ്വാഴ്ച രാവിലെ ശ്രീഹരിക്കോട്ടയിലെ സതീഷ് ധവാന്‍ വിക്ഷേപണത്തറയില്‍ നിന്ന് കുതിച്ചുയര്‍ന്നതോടെ അഭിമാനകരമായ നേട്ടമാണ് ഐഎസ്ആര്‍ഒ കൈവരിച്ചിരിക്കുന്നത്. 27 മണിക്കൂര്‍ കൗണ്ട് ഡൗണിനു ശേഷമാണ് റോക്കറ്റ് കുതിച്ചുയര്‍ന്നത്. ഗതി നിര്‍ണയ ആവശ്യങ്ങള്‍ക്കായി ഭാരതം വികസിപ്പിക്കുന്ന സംവിധാനത്തിനു വേണ്ടിയുള്ള ഉപഗ്രഹമാണിത്. ഈ ദൗത്യത്തിന്റെ ആദ്യ ഉപഗ്രഹമായ എസ് വി എസ്-01 രണ്ടുവര്‍ഷം മുന്‍പ് വിക്ഷേപിച്ചിരുന്നു. അതിന്റെ തുടര്‍ച്ചയാണ് ഇപ്പോഴത്തേത്. നിരവധി ചരിത്ര നേട്ടങ്ങളിലൂടെ ഐഎസ്ആര്‍ഒയെ പുതിയ ഉയരത്തില്‍ എത്തിച്ച എസ്. സോമനാഥിന്റെ പിന്‍ഗാമിയായി ഡോ. വി. നാരായണന് ചെയര്‍മാന്‍ പദവി ഏറ്റെടുത്ത് ദിവസങ്ങള്‍ക്കുശേഷമാണ് സ്ഥാപനം ഈ ഐതിഹാസിക നേട്ടം കൈവരിച്ചിരിക്കുന്നത്.
46 വര്‍ഷമെടുത്താണ് ഐഎസ്ആര്‍ഒ അഭിമാനകരമായ നേട്ടങ്ങള്‍ ഒന്നിന് പുറകെ ഒന്നായി സ്വന്തമാക്കിയത്. അടുത്ത നൂറ്റാണ്ടില്‍ നേട്ടങ്ങള്‍ കൊയ്യാന്‍ ഇങ്ങനെയൊരു കാലദൈര്‍ഘ്യം വേണ്ടിവരില്ല. 1979 ആഗസ്റ്റിലാണ് ശ്രീഹരിക്കോട്ടയില്‍ നിന്ന് ഐഎസ്ആര്‍ഒ ആദ്യ റോക്കറ്റ് വിക്ഷേപിച്ചത്. തനത് സാങ്കേതിക വിദ്യ ഉപയോഗിച്ച് നിര്‍മ്മിക്കുകയും, എസ് വി എസ് -2 ഉപഗ്രഹത്തെ ഭ്രമണ പഥത്തില്‍ എത്തിക്കുകയും ചെയ്യുന്ന റോക്കറ്റ് വിക്ഷേപണത്തിന്റെ വിജയം വരെ എടുക്കുമ്പോള്‍ ലോകത്തെ ബഹുഭൂരിപക്ഷം രാജ്യങ്ങള്‍ക്കും കഴിയാത്ത നേട്ടമാണ് ഐഎസ്ആര്‍ഒ കൈവരിച്ചിട്ടുള്ളതെന്ന് ബോധ്യമാകും. നിരവധി തലമുറകളില്‍പ്പെട്ട ശാസ്ത്രജ്ഞരുടെ പ്രയത്‌നഫലമാണ് ഐഎസ്ആര്‍ഒയുടെ ഇതുവരെയുള്ള വിജയം. നൂറാമത്തെ റോക്കറ്റ് വിക്ഷേപണം ഐഎസ്ആര്‍ഒ പ്രതീക്ഷിച്ചതുപോലെ തന്നെയാണ് നടന്നത്. ഭാരതത്തിന്റെ ബഹിരാകാശ ദൗത്യം ഇതിലൂടെ പുതിയൊരു ഘട്ടത്തിലേക്ക് പ്രവേശിച്ചിരിക്കുന്നു. പ്രധാനമന്ത്രി നരേന്ദ്രമോദി അധികാരത്തില്‍ വന്നശേഷം രാഷ്ട്രത്തിന്റെ ബഹിരാകാശ ദൗത്യത്തിന് സമ്പൂര്‍ണ്ണ പിന്തുണയാണ് സര്‍ക്കാരില്‍ നിന്ന് ലഭിക്കുന്നത്. മറ്റു പല രാജ്യങ്ങളുടെയും കണ്ണഞ്ചിപ്പിക്കുന്ന മംഗള്‍യാന്‍, ചന്ദ്രയാന്‍ മുതലായ നേട്ടങ്ങള്‍ ഭാരതം കൈവരിച്ചു. ഭാരതത്തിന്റെ ബഹിരാകാശ സഞ്ചാരികളെ ചന്ദ്രനില്‍ ഇറക്കുക എന്ന ദൗത്യമാണ് ഇപ്പോള്‍ ഐഎസ്ആര്‍ഒയുടെ മുന്നിലുള്ളത്. ഇതിനായി എസ്ജിഎല്‍വി റോക്കറ്റുകള്‍ വികസിപ്പിക്കേണ്ടതുണ്ട്. നിലവിലെ എന്‍വിഎസ് റോക്കറ്റിനേക്കാള്‍ രണ്ടിരട്ടി ഉയരമാണ് ഇതിനു ഉണ്ടാവുക. ചുമതലയേറ്റ ശേഷമുള്ള വിജയത്തു ടക്കത്തില്‍ ഡോ. നാരായണന് അഭിമാനിക്കാം. നൂറാമത്തെ ഈ റോക്കറ്റ് വിക്ഷേപണത്തിന്റെ മിഷന്‍ ഡയറക്ടര്‍ മലയാളിയായ തോമസ് കുര്യന്‍ ആയിരുന്നു എന്നത് ഓരോ മലയാളിക്കും അഭിമാനം സമ്മാനിക്കുന്നു. വിക്ഷേപണം വിജയകരമായി പൂര്‍ത്തിയായെന്ന് അറിയിച്ച ഐഎസ്ആര്‍ഒ ചെയര്‍മാന്‍ ശ്രീഹരിക്കോട്ടയിലെ മൂന്നാം വിക്ഷേപണത്തറയ്‌ക്ക് അനുമതി ലഭിച്ചു കഴിഞ്ഞെന്നും, ചന്ദ്രയാന്‍ ശ്രേണിയില്‍ അടക്കം കൂടുതല്‍ ദൗത്യങ്ങള്‍ നിര്‍വഹിക്കാനുണ്ടെന്നും പറയുന്നു. . അമേരിക്കന്‍ ബഹിരാകാശ സ്ഥാപനമായ നാസയുടെയും ഐഎസ്ആര്‍ഒയുടേയും സംയുക്ത സംരംഭമായ നിസാര്‍ ഉപഗ്രഹ വിക്ഷേപണം വൈകാതെ നടക്കും. നൂറാം റോക്കറ്റ് വിക്ഷേപണത്തിന്റെ വിജയത്തോടെ ഐഎസ്ആര്‍ഒ ഒരിക്കല്‍ക്കൂ ടി രാജ്യത്തിന് അഭിമാനം സമ്മാനിച്ചിരിക്കുകയാണെന്നും, വിക്രം സാരാഭായിയും സതീഷ് ധവാനും മറ്റും ചേര്‍ന്ന് തുടക്കമിട്ട മഹത്തായ കുതിപ്പിന്റെ കഥയാണ് ശ്രീഹരിക്കോട്ടയിലെ നൂറാം വിക്ഷേപണമെന്നുമുള്ള കേന്ദ്ര ശാസ്ത്ര സാങ്കേതിക വകുപ്പ് മന്ത്രി ഡോ. ജിതേന്ദ്ര സിങ്ങിന്റെ വാക്കുകള്‍ ശ്രദ്ധേയമാണ്. വന്‍ ശക്തികളെപ്പോലും അതിശയിപ്പിക്കുന്ന നേട്ടം ബഹിരാകാശ രംഗത്ത് കൈവരിച്ച ഭാരതം ലോകത്തിന്റെ മുന്‍നിരയിലേക്ക് വരികയാണ്. ബഹിരാകാശ രംഗത്ത് ഇനിയുള്ള കാലം ഭാരതം അത്യപൂര്‍വ്വമായ വിജയങ്ങള്‍ നേടിയെടുക്കുമെന്ന് ഉറപ്പ്.
പ്രതികരിക്കാൻ ഇവിടെ എഴുതുക