മുംബൈ: ബോളിവുഡില്‍ എന്നല്ല, ഇന്ത്യന്‍ സിനിമാ രംഗത്ത് അവിശ്വസനീയമായ തിരിച്ചുവരവിന്റെ കഥയാണ് അക്ഷയ് കുമാറിന്‍റേത്. തുടര്‍ച്ചയായി 16 സിനിമകള്‍ പരാജയപ്പെട്ട ശേഷം ഒടുവില്‍ ഒരു സൂപ്പര്‍ ഹിറ്റ്. 1965-ലെ ഇന്ത്യ-പാകിസ്ഥാൻ വ്യോമയുദ്ധത്തിന്റെ പാശ്ചത്തലത്തില്‍ ഒരുക്കിയിരിക്കുന്ന ദേശ സ്നേഹത്തിന്റെ പേരിലുള്ള ത്യാഗത്തിന്റെ കഥ പറയുന്ന സ്കൈ ഫോഴ്സ് എന്ന സിനിമയില്‍ ഒരു ഫൈറ്റര്‍ പൈലറ്റായാണ് അക്ഷയ് കുമാര്‍ പ്രത്യക്ഷപ്പെടുന്നത്. റിലീസായി അഞ്ച് ദിവസത്തില്‍ സ്കൈ ഫോഴ്സ് ആഗോളതലത്തില്‍ 89.5 കോടി രൂപ നേടി എന്നാണ് റിപ്പോര്‍ട്ട്.
ഇതിന് മുന്‍പ് ബെല്‍ബോട്ടം, സെല്‍ഫീ, സര്‍ഫീറ, ഖേല്‍ ഖേല്‍ മെം, ഛോട്ടെ മിയാന്‍ ബഡേ മിയാന്‍ തുടങ്ങി അക്ഷയ് കുമാറിന്റെ 16ഓളം സിനിമകള്‍ പരാജയപ്പെട്ടിരുന്നു. എല്ലാ വിഭാഗവും അക്ഷയ് കുമാര്‍ പയറ്റിനോക്കി. കോമഡി, ആക്ഷന്‍, പ്രേമം, കുറ്റാന്വേഷണം അങ്ങിനെ എല്ലാം. പക്ഷെ തൊടുന്നതെല്ലാം ഫ്ലോപ്പായതോടെ ഈ സൂപ്പര്‍ സ്റ്റാറിന്റെ കഥ കഴിഞ്ഞു എന്നുവരെ വിധി എഴുതിയതാണ് ബോളിവുഡ്. കൊറോണ വൈറസിന് ശേഷം അക്ഷയ് കുമാറിന്റെ സൂര്യവംശി എന്ന ഒരു സിനിമ മാത്രമേ വിജയം നേടിയുള്ളൂ. 2022ല്‍ പുറത്തിറങ്ങിയ സമ്രാട്ട് പൃഥ്വിരാജ്, രക്ഷാബന്ധന്‍, രാമസേതു എന്നിവ പരാജയമായിരുന്നു. 2023ല്‍ പുറത്തിറങ്ങിയ സെല്‍ഫി, മിഷന്‍ റാണിഗഞ്ച് എന്നിവയും പരാജയമായി. 2024ലെ സര്‍ഫീറ, ഖേല്‍ ഖേല്‍ മേം, എന്നിവയും പരാജയമായിരുന്നു. പക്ഷെ ഇപ്പോഴിതാ അവിശ്വസനീയമായ തിരിച്ചുവരാണ് സ്കൈ ഫോഴ്സിലൂടെ നേടിയത്.
നല്ല പോസിറ്റീവ് റിവ്യൂകളാണ് സ്കൈ ഫോഴ്സ് സമൂഹമാധ്യമങ്ങളില്‍ നേടുന്നത്. തീര്‍ച്ചയായും കണ്ടിരിക്കേണ്ട ചിത്രം എന്നാണ് എല്ലാവരും കുറിക്കുന്നത്. സന്ദീപ് കെവ്‌ലാനിയും അഭിഷേക് കപൂറുമാണ് സംവിധാനം നിര്‍വഹിച്ചിരിക്കുന്നത്. അക്ഷയ് കുമാറിന്റെയും വീര്‍ പഹാര്യയുടെയും മികച്ച പ്രകടനമാണ് വിജയത്തിന് പിന്നില്‍. സാറാ അലി ഖാനും ഒരു പ്രധാന റോളുണ്ട്.
ദിനേശ് വിജൻ, അമർ കൗശിക്, ജ്യോതി ദേശ്‍പാണ്ഡെ എന്നിവർ ചേർന്നാണ് സ്കൈ ഫോഴ്സ് നിര്‍മിച്ചിരിക്കുന്നത്. ശരദ് ഖേല്‍ഖര്‍, മനിഷ് ചൗധരി, മോഹിത് ചൗഹാൻ, വരുണ്‍ ബഡോല, സോങം, അഭിനവ്, റിതി, അനുപമം ജോര്‍ദര്‍, ജയ്വന്ത് വാഡ്‍കര്‍, വിശാല്‍ ജിൻവാല്‍, അഭിഷേക് മഹേന്ദ്ര, ബ്രയാൻ ലോറൻസ്, ഫയാസ് ഖാൻ തുടങ്ങിയവരും ഉണ്ട്. തനിഷ്‍ക ഭാഗ്‍ചിയാണ് സംഗീത സംവിധാനം.
പ്രതികരിക്കാൻ ഇവിടെ എഴുതുക: