കൊച്ചി: ചോറ്റാനിക്കരയില്‍ പെണ്‍കുട്ടിയെ വീടിനുള്ളില്‍ പരിക്കേറ്റ് അവശനിലയില്‍ കണ്ടെത്തിയ സംഭവത്തില്‍ പെണ്‍കുട്ടിയുടെ നില അതീവ ഗുരുതരം.ആശുപത്രിയില്‍ വെന്റിലേറ്ററില്‍ കഴിയുന്ന പെണ്‍കുട്ടി മരുന്നുകളോട് പ്രതികരിക്കുന്നില്ല.പെണ്‍കുട്ടിയുടെ തലയ്‌ക്കുള്ളില്‍ ഗുരുതരമായ പരിക്കേറ്റതായാണ് ഡോക്ടര്‍മാര്‍ പറയുന്നത്.
സംഭവത്തില്‍ നേരത്തെ കസ്റ്റഡിയിലെടുത്ത പെണ്‍കുട്ടിയുടെ ആണ്‍സുഹൃത്ത്് തലയോലപ്പറമ്പ് സ്വദേശി അനൂപിന്റെ(24) അറസ്റ്റ് പൊലീസ് രേഖപ്പെടുത്തി. വധശ്രമത്തിനും ബലാത്സംഗത്തിനും ഇയാള്‍ക്കെതിരെ കേസെടുത്തിട്ടുണ്ട്.
എന്നാല്‍, പെണ്‍കുട്ടിയുമായി തര്‍ക്കത്തിലേര്‍പ്പെട്ടപ്പോള്‍ സ്വയം ഷാള്‍ ഉപയോഗിച്ച് കഴുത്തിന് കുരുക്കിടുകയായിരുന്നുവെന്നാണ് അനൂപ് മൊഴി നല്‍കിയത്.പെണ്‍കുട്ടിയെ മര്‍ദിച്ചതായും തുടര്‍ന്ന് പെണ്‍കുട്ടി ആത്മഹത്യയ്‌ക്ക് ശ്രമിച്ചതായും യുവാവ് മൊഴി നല്‍കി.
പെണ്‍കുട്ടിക്ക് ദേഹോപദ്രവമേട്ടിട്ടുണ്ടെന്നും അമ്മയുടെ പരാതിയില്‍ ബലാത്സംഗം, വധശ്രമ കേസുകള്‍ ചുമത്തുകയായിരുന്നുവെന്നും പൊലീസ് അറിയിച്ചു. ലഹരി കേസിലെ പ്രതിയാണ് അനൂപ്.പീരുമേട് സ്‌റ്റേഷനില്‍ ഇയാള്‍ക്കെതിരെ കഞ്ചാവ് കേസുണ്ട്. തലയോലപ്പറമ്പ് പൊലീസ് സ്‌റ്റേഷനില്‍ രജിസ്റ്റര്‍ ചെയ്ത രണ്ട് ആക്രമണ കേസുകളിലും ഇയാള്‍ പ്രതിയാണ്.
ഒരു വര്‍ഷം മുമ്പ് ഇന്‍സ്റ്റാഗ്രാമിലൂടെയാണ് യുവാവ് പെണ്‍കുട്ടിയുമായി പരിചയപ്പെട്ടത്. തുടര്‍ന്ന് പെണ്‍കുട്ടിയുടെ വീട്ടിലും ഇയാള്‍ എത്താറുണ്ടയിരുന്നു.നാട്ടുകാരുമായി ഇയാള്‍ വാക്കുതര്‍ക്കത്തില്‍ ഏര്‍പ്പെട്ടിരുന്നുവെന്നും പ്രദേശവാസികള്‍ പറഞ്ഞു.
ദത്ത് എടുത്ത് വളര്‍ത്തിയ പെണ്‍കുട്ടിയുമായി സ്വരച്ചേര്‍ച്ചയില്ലാതായതോടെ അമ്മ മറ്റൊരിടത്താണ് താമസിച്ചിരുന്നത്.അക്രമത്തിനിരയായ പെണ്‍കുട്ടി 2012ലെ പോകസോ കേസില്‍ അതിജീവിതയാണ്. ശനിയാഴ്ചയാണ് പെണ്‍കുട്ടി ആക്രമണത്തിനിരയായതെന്നാണ് കരുതുന്നത്.
ഞായറാഴ്ച വീട്ടിലെത്തിയ ബന്ധുക്കളാണ് പെണ്‍കുട്ടിയെ അര്‍ധനഗ്‌നയായി അവശനിലയില്‍ വീടിനുള്ളില്‍ കണ്ടെത്തിയത്. കഴുത്തില്‍ കയര്‍ മുറുകി പരിക്കേറ്റ നിലയിലായിരുന്നു പെണ്‍കുട്ടി. 19കാരിയുടെ കയ്യില്‍ മുറിവുണ്ടായിരുന്നു. ഈ മുറിവില്‍ ഉറുമ്പരിച്ച നിലയിലാണ് കണ്ടെത്തിയത്.
പ്രതികരിക്കാൻ ഇവിടെ എഴുതുക: